«Թուրքիան հնարաւոր բոլոր միջոցներով ձգտում է թոյլ չտալ հրադադարի իրականացումը». ԱՀ ԱԳՆ

Արցախի Հանրապետութեան արտաքին գործերի նախարարութիւնը յայտարարութիւն է տարածել Ադրբեջանի կողմից մարդասիրական հրադադարի շարունակւող խախտումների վերաբերեալ՝ նշելով, որ Թուրքիան, չհասնելով իր առջեւ դրւած նպատակներին եւ այդ պատճառով շահագրգռւած չլինելով տարածաշրջանում ամուր խաղաղութեան հաստատման մէջ, հնարաւոր բոլոր միջոցներով ձգտում է թոյլ չտալ Ռուսաստանի Դաշնութեան միջնորդութեամբ համաձայնեցւած մարդասիրական հրադադարի մասին պայմանաւորւածութեան իրականացումը։ Այս մասին յայտնում են Արցախի Հանրապետութեան արտգործնախարարութեան տեղեկատւութեան եւ հասարակայնութեան հետ կապերի վարչութիւնից:

«Ի հեճուկս 2020 թ․ հոկտեմբերի 9-10 Մոսկւայում Ռուսաստանի Դաշնութեան միջնորդութեամբ՝ մարդասիրական նպատակներով ռազմագերիների եւ զոհւածների մարմինների փոխանակման համար հրադադարի վերաբերեալ ձեռք բերւած պայմանաւորւածութեանը, ադրբեջանական բանակը, գտնւելով Թուրքիայի հրամանատարութեան ղեկավարման ներքոյ, շարունակում է ագրեսիւ գործողութիւնները եւ Արցախի տարածքի հրետակոծութիւնները, այդ թւում՝ խաղաղ բնակչութեան եւ քաղաքացիական օբիեկտների վրայ։

Մարդասիրական հրադադարը խախտել է ադրբեջանական կողմը` Արցախի Հանրապետութեան Պաշտպանութեան բանակի կողմից կրակի դադարեցման մասին յայտարարելուց ընդամենը րոպէներ անց։ Ադրբեջանա-թուրքական ուժերը չդադարող հրթիռա-հրետանային գնդակոծութեանը զուգահեռ յարձակումներ են ձեռնարկում առաջնագծի տարբեր ուղղութիւններով։ Թուրքիայի, Ադրբեջանի եւ միջազգային ահաբեկիչների եռեակ դաշինքի ագրեսիւ գործողութիւնների, այդ թւում՝ մարդասիրական հրադադարի մասին յայտարարելուց յետոյ Հադրութի ուղղութեամբ դիւերսիոն յարձակումների արդիւնքում սպանւել է չորս խաղաղ բնակիչ։

Թուրք-ադրբեջանական ուժերի փաստացի հրաժարումը՝ դադարեցնելու կրակը, միանշանակ վկայում է, որ Թուրքիան, չհասնելով իր առջեւ դրւած նպատակներին եւ այդ պատճառով շահագրգռւած չլինելով տարածաշրջանում ամուր խաղաղութեան հաստատման մէջ, հնարաւոր բոլոր միջոցներով ձգտում է թոյլ չտալ Ռուսաստանի Դաշնութեան միջնորդութեամբ համաձայնեցւած մարդասիրական հրադադարի մասին պայմանաւորւածութեան իրականացումը։ Թուրքիան չի հրաժարւում Ադրբեջանի եւ միջազգային ահաբեկիչների ձեռքերով Հարաւային Կովկասում իր աշխարհաքաղաքական ծաւալապաշտական խնդիրները լուծելու փորձերից։

Այս պայմաններում, երբ մի կողմը՝ ի դէմս Թուրքիայի, Ադրբեջանի եւ միջազգային ահաբեկիչների, յամառօրէն ընդդիմանում է խաղաղութեան հաստատմանը, միջազգային հանրութիւնը պէտք է վճռական միջոցներ ձեռնարկի, այդ թւում՝ պարտադրող բնոյթի՝ տարածաշրջանում խաղաղութեան վերականգնման համար։ Այս ուղղութեամբ կարեւոր քայլ է նաեւ Արցախի Հանրապետութեան անկախութեան միջազգային ճանաչումը»,- ասւում է յայտարարութեան մէջ։

Alikonline.ir