Հայաստանի ՊՆ. Տեղեկություններ կան Թուրքիայի կողմից Աֆղանստանից Ադրբեջան զինյալների տեղափոխման մասին

Ռուսաստանի Դաշնության հատուկ ծառայությունները հաստատեցին ավելի վաղ մեր կողմից տրամադրված տեղեկությունները Մերձավոր Արեւելքից Ադրբեջան զինյալների տեղափոխման մասին՝ Արցախի դեմ ագրեսիային մասնակցելու համար: Այս մասին հոկտեմբերի 7-ի երեկոյան կայացած ճեպազրույցում հայտարարեց ՀՀ պաշտպանության նախարարության ներկայացուցիչ Արծրուն Հովհաննիսյանը:

«Նրանք մի փոքր պարզաբանեցին տեղեկատվությունը, նշեցին խմբավորումների անուններն ու անվանումները: Բացի ռուսական կողմից, զինյալների մասնակցության մասին հայտարարել են ԱՄՆ-ի ու Բրիտանիայի ներկայացուցիչները: Խոսքը 3-4 հազար վարձկանների մասին է: Այսօր տեղեկատվություն է հայտնվել, որ Թուրքիան շարունակում է նույն ոգով. այս անգամ խոսքը Աֆղանստանից զինյալների տեղափոխման մասին է:

Հարցին, թե դաշնակիցները տեղյա՞կ են այս մասին, Հովհաննիսյանը համոզմունք հայտնեց, որ ինչպես ներքին իրավասու մարմինները, այնպես էլ դաշնակից խոշոր պետությունների եւ տարածաշրջանային երկրների իրավասու մարմինները տեղեկացված են նման գործողությունների մասին, եւ նրանք անում են համապատասխան հայտարարություններ:

Ինչ վերաբերում է այն տեղեկություններին, որ սիրիացի վարձկանները փոշմանել են եւ փորձում են փախչել, Հովհաննիսյանը նշեց, որ վարձկանները ընդհանրապես ունեն նման սովորություն՝ փախչել, եթե գործերը վատ են: «Մնացած մանրամասները իրենց ժամանակին»,- հավելեց նա:

https://news.am/arm/news/606696.html