Ասատ. «Լեռնային Ղարաբաղի տագնապի սրման գլխաւոր հրահրողն ու նախաձեռնողը Էրտողանն է»

Սուրիոյ նախագահ Պաշշար Ասատ «ՌԻԱ Նովոսթի» լրատու գործակալութեան հետ հարցազրոյցի ընթացքին յայտարարած է, թէ Լեռնային Ղարաբաղի տագնապի նոր սրման գլխաւոր նախաձեռնողը Թուրքիոյ նախագահ Ռեճեփ Թայիփ Էրտողանն է:

«Լիպիոյ մէջ ան ահաբեկիչներուն կ՛աջակցի, Լեռնային Ղարաբաղի մէջ Ազրպէյճանի եւ Հայաստանի միջեւ վերջերս սկսած տագնապի գլխաւոր հրահրողն ու նախաձեռնողն ալ անձամբ ինք եղած է», յայտարարած է Ասատ:

Սուրիոյ նախագահը նաեւ յայտարարած է, որ Սուրիայէն զինեալներ կը տեղափոխուին Լեռնային Ղարաբաղի տագնապի գօտի, եւ Դամասկոս կրնայ ատիկա հաստատել:

«Մենք կրնանք ատիկա ամբողջովին հաստատել, սակայն ոչ այն պատճառով, որ ապացոյցներ ունինք: Երբեմն ապացոյցներ չկան, սակայն կան անոնց ցուցանիշները», ըսած է Ասատ` պատասխանելով այն հարցումին, թէ կրնա՞յ հաստատել, որ Սուրիոյ մէջ կռուող խմբաւորումներէն ահաբեկիչներ կը տեղափոխուին հայ-ազրպէյճանական տագնապի գօտի:

«ՌԻԱ Նովոսթի» կը հաղորդէ, որ Թուրքիոյ խորհրդարանի անդամ Էօզթիւրք Եըլմազ անդրադառնալով Ասատի յայտարարութիւններուն յայտնած է. «Ասատ անձնական հակակրանք ունի Էրտողանի նկատմամբ: Ուզելով Էրտողանին վնաս հասցնել` ան կը վնասէ ամբողջ Թուրքիոյ: Ասատի յայտարարութիւնները ոչ մէկ արժէք ունին եւ քարոզչութեան գործիք են»:

Ան աւելցուցած է, որ Թուրքիան Ազրպէյճանի եւ արեւելեան Միջերկրականի շրջաններուն մէջ իր իրաւունքներն ու շահերը ունի:

http://www.aztagdaily.com/archives/485491