«Եղեք արդար և անկողմնակալ». Էրդողանը Եվրոպայի խորհրդի նախագահի հետ քննարկել է Միջերկրական ծովի արևելքում առկա իրավիճակը

Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել Եվրոպայի խորհրդի նախագահ Շառլ Միշելի հետ, որի ընթացքում կողմերը քննարկել են Միջերկրական ծովի արևելքում առկա իրավիճակն ու Թուրքիա-ԵՄ հարաբերությունները: Այս մասին տեղեկացնում է «Անադոլու» գործակալությունը` հղում տալով Թուրքիայի կապի և հաղորդակցության նախարարությանը:

Հեռախոսազրույցի ընթացքում Էրդողանը նշել է` իբր Եվրամիությունը պետք է «արդարացիորեն կատարի Հունաստանի և ԵՄ մի քանի անդամ երկրների` Միջերկրական ծովի արևելքում իրավիճակը սրելուն ուղղված քայլերը կանխարգելելու իր պարտավորությունները»:

Թուրք ղեկավարն ընդգծել է նաև, որ եվրոպացի քաղաքական գործիչների «սադրիչ ելույթներն ու քայլերը չեն ծառայի հարցի լուծմանը, իսկ ԵՄ դիրքորոշումը կդառնա անկեղծության ստուգում միջազգային իրավունքի և տարածաշրջանային խաղաղության տեսանկյունից»:

Էրդողանը ԵՄ հաստատություններին և անդամ երկրներին կոչ է արել  մնալ արդար, անկողմնակալ, օբյեկտիվ և պատասխանատու տարածաշրջանային բոլոր հարցերում, հատկապես` Միջերկրական ծովի արևելքում:

Թուրքիայի հարաբերությունները Միջերկրական ծովի արևելյան հատվածի պետությունների հետ սրվել են Անկարայի կողմից այս երկրների ջրային տարածքներում հորատման աշխատանքներ սկսելուց  հետո:

https://www.tert.am/am/news/2020/09/07/Erdogan-Michel/3389247