Հայաստանի արտաքին գործոց նախարարութիւնը դատապարտելի կը նկատէ Թուրքիոյ այն քայլը, որով վերջինս արգիլած է գերմանական օդանաւը թռիչք կատարելու իր օդային տարածքով եւ հասցնելու հայ խաղաղապահները:
«Արմէնփրես»-ի հարցումին ի պատասխան` այս մասին 2 սեպտեմբերին կայացած մամլոյ ասուլիսին ընթացքին Հայաստանի արտաքին գործոց նախարարի մամլոյ բանբեր Աննա Նաղդալեան ըսաւ.
«Դատապարտելի է, որ Թուրքիան արդէն իսկ կը խոչընդոտէ ՕԹԱՆ-ի եւ ՄԱԿ-ի ծիրին մէջ խաղաղապահներու գործողութիւնները` մեկնելով պարզապէս իր հակահայկական դիրքերէն: Մենք այս հարցին մասին նաեւ բարձրաձայնած ենք մեր միջազգային գործընկերներուն մօտ` դիւանագիտական խողովակներով»:
Միւս կողմէ, անդրադառնալով Լեռնային Ղարաբաղի տագնապի խաղաղ լուծման գործընթացին, Աննա Նաղդալեան ըսաւ, թէ զինադադարի ամրապնդումը Հայաստանի առաջնահերթութիւններէն է` հաստատելով. «Զինադադարի ամրապնդումը Հայաստանի առաջնահերթութիւններէն է խաղաղ գործընթացին մէջ, առանց որուն անհնար է պատկերացնել խաղաղ գործընթացի զարգացումը»:
Horizonweekly.ca
Leave a Reply