«Դա մեր ազգը պետք է որոշի». Էրդողանը մտադիր է Սուրբ Սոֆիայի տաճարը մզկիթի վերածել

Թուրքիայի նախագահ Ռեջեփ Թայիփ Էրդողանն օգնականներին հանձնարարել է Սուրբ Սոֆիայի տաճարը թանգարանից մզկիթի կարգավիճակի վերափոխելու մասին բազմակողմանի ուսումնասիրություն կատարել: Այս մասին տեղեկացնում է «Հուրրիյեթ» պարբերականը:

«Ուսումնասիրություն կատարեք, հետո մենք ամեն բան կգնահատենք և կխոսենք: Զբոսաշրջիկները կարող են Այա Սոֆիա այցելել, եթե այն մզկիթ դառնա: Դա մեր ազգը պետք է որոշի»,-հայտարարել է Էրդողանը իշխող Արդարություն և զարգացում կուսակցության նիստի ժամանակ:

Սուրբ Սոֆիայի տաճարը բյուզանդական ճարտարապետության հուշակոթող է: Այն կառուցվել է 532-537 թվականներին ՝ Հուստինիանոս կայսեր կողմից, որը որոշել էր այս տաճարով հավերժացնել Կոստանդնուպոլսի փառքը:

1453-ին Բյուզանդական կայսրության անկումից հետո տաճարը վերածվել է մզկիթի: 1935-ին, Թուրքիայի կառավարության որոշմամբ, որը ստորագրվել է ժամանակակից թուրքական պետության հիմնադիր Քեմալ Աթաթուրքի կողմից, տաճարը դարձել է թանգարան: 1985-ին տաճարն ընդգրկվել է ՅՈՒՆԵՍԿՕ-ի Համաշխարհային ժառանգության ցանկում:

Tert.am