Հանրապետության նախագահ Արմեն Սարգսյանը Ծիծեռնակաբերդի այգու տարածքում «Հայ պարկի» ստեղծման գաղափարն այս փուլում քննարկում է մասնագիտական շրջանակների հետ:
Հիշեցնենք, որ վերջերս Արմեն Սարգսյանը ներկայացրել էր Ծիծեռնակաբերդի այգու տարածքում «Հայ պարկ» հիմնելու իր գաղափարը: Նա առաջարկել է Ծիծեռնակաբերդի տարածքում ստեղծել «Հայ պարկ»՝ համազգային այգի, որը կսկսվի Հայոց ցեղասպանության զոհերի հուշարձանի մոտից և կձգվի մոտավորապես 100 հեկտար:
Տրամաբանությունը հետևյալն է՝ այգու առաջին հատվածը կազմված կլինի մասերից, որոնք կներկայացնեն մեր պատմական հայրենիքի շրջանները, օրինակ՝ Վանը, Էրզրումը և այլն։ Երկրորդ շերտը կներկայացնի սփյուռքահայությանը՝ Փարիզ, Լոս Անջելես, Մոսկվա, Հայաստանի և Արցախի այսօրվա շրջանները, քաղաքներն ու կառույցները, օրինակ՝ Գյումրի, Շուշի կամ Երևանի պետական համալսարան։
Նախագահ Արմեն Սարգսյանի խոսքով, այս բաժանումը խորհրդանշական է, խորհրդանշական կլինի նաև, եթե Ծիծեռնակաբերդում 1,5 միլիոն ծառ տնկվի՝ յուրաքանչյուր զոհի համար մեկ տնկի:
«Այս այգին կնկարագրի մեր պատմական կորուստները և, միաժամանակ, այսօրվա հայկական աշխարհը, հայկական պետականությունը՝ Հայաստանով և Արցախով։ Ընդ որում՝ այգու առանձին կտորները բաժանելով և անուններ տալով, կարող ենք քաջալերել, որ օրինակ՝ վանեցիները վերցնեն այգու Վանա տարածքը և մշակեն։ Սա կդառնա համազգային այգի, հայկական այգի, Հայ պարկ»,- ասել էր նա:
Արմեն Սարգսյանը ժամանակին այս գաղափարը քննարկել է աշխարհի ամենահայտնի լանդշաֆտային դիզայներական ընկերություններից մեկի հետ, որը կատարել է նախնական ուսումնասիրություն և նույնիսկ գծագրի տեսքով ձևակերպել է գաղափարը:
«Սա առաջարկություն է, որ ինչ-որ ձևով հիշենք մեր հսկայական կորուստները՝ և՛ մարդկային, և՛ պատմական, և՛ մշակութային, մյուս կողմից՝ համազգային ձևով, բոլորիս համերաշխ աշխատանքով ստեղծենք այգի, որը հենց մեր անունն էլ ունենա՝ «Հայ պարկ»: Մենք աշխարհին ցույց կտանք, որ վերապրող ժողովուրդ ենք, միևնույն ժամանակ Երևանին նոր թոքեր կպարգևենք, որ մեր քաղաքն իր բնակիչներով ավելի առողջ պայմաններում ապրի»,- ասել է Արմեն Սարգսյանը:
Ըստ նախագահի՝ կարևոր է, որ այգու ստեղծման գաղափարի հիմքում միասնականությունն է: Այն լինելու է համազգային այգի, հիշողության այգի: Այն պետք է դառնա Ծիծեռնակաբերդի հուշարձանի գաղափարի շարունակությունը՝ միևնույն ժամանակ լուծելով թե՛ տարածքի բարեկարգման, թե՛ մայրաքաղաքի համար մեծ կանաչ գոտու ապահովման հարցը:
Համազգային այգին՝ «Հայ պարկը» իր մեջ ներառելու է նաև Հայոց ցեղասպանության հուշահամալիրը և Ցեղասպանության թանգարան-ինստիտուտը։
Մասնագետները ողջունում են Արմեն Սարգսյանի այս նախաձեռնությունը: Հուշահամալիրի համահեղինակ ճարտարապետ Սաշուր Քալաշյանի խոսքով, նախագահի այս գաղափարը կարևոր է նրանով, որ անխնամ վիճակում գտնվող այդ տարածքը կազմակերպման կարիք ունի: Եվ «Հայ պարկի» ստեղծման գաղափարը հենց այդ հարցի լուծման ճանապարհներից մեկն է:
«Այլ խնդիր է, թե ինչ ձևով պետք է լուծվի, ինչ միջոցներ պետք է կիրառվեն, նախագծային ինչ լուծումներ պետք է տրվեն, բայց դա իրատեսական է, ես խնդիր չեմ տեսնում: Ծրագիրը կապված է ոչ միայն այգու բարեկարգման, այլ նաև համայն հայության համախմբման ձևաչափի հետ: Ես ծրագրի իրականացման մեջ ոչ մի խնդիր չեմ տեսնում, մենք այդ ներուժն ու կարողությունն ունենք, պատրաստ ենք իրականացնել»,- նշում է Սաշուր Քալաշյանը:
Հուշահամալիրի մյուս համահեղինակ Արթուր Թարխանյանի դստեր՝ ճարտարապետ Անահիտ Թարխանյանի խոսքով, սա կարևոր ծրագիր է՝ վերականգնելու Ծիծեռնակաբերդի այգին: «Այն միավորելով մեզ բոլորիս՝ հնարավորություն է տալիս ոչ միայն ստեղծել և վերստեղծել Ծիծեռնակաբերդի այգին, այլ որ շատ կարևոր է՝ միջազգային հանրության առաջ ևս մեկ անգամ հնչեցնել հայերի Ցեղասպանության հարցը: Ես գտնում եմ, որ այս ծրագիրը մեզ բոլորիս հնարավորություն է տալիս, որ ամեն մեկս մեր հնարավորությամբ ու ցանկությամբ մասնակցենք ու մեր լուման բերենք ծրագրի կայացման համար»,- ասում է Անահիտ Թարխանյանը:
Նրա խոսքով՝ մյուս կողմից, այս ծրագրով վերականգնվում են կանաչ գոտիները: «Սա փաստացի մեր վերջին կանաչ գոտին է, որը մնացել է և որտեղ հնարավոր է վերականգնել կանաչ տարածքները: Ցանկացած ծրագիր, որն իր հետ բերում է Երևանի կանաչապատման ու օդի բարելավման հնարավորություն, կարևոր է ոչ միայն զբոսայգու ու գաղափարի տեսակետից, այլ շատ կարևոր է նաև մեր առողջության տեսակետից»,- նշում է Թարխանյանը:
Ֆրանսահայ պատմաբան, ցեղասպանագետ, Հայոց ցեղասպանության թանգարան-ինստիտուտի Հոգաբարձուների խորհրդի նախագահ Ռեյմոն Հարություն-Գևորգյանը վստահ է՝ այս գաղափարի շուրջ համահայկական համախմբում տեղի կունենա: Նրա խոսքով, Ցեղասպանության 100-ամյակից հետո մեր ազգային հիշողությունը պետք է մշակվի և հարատևի, իսկ դրա համար միայն գիտնականների աշխատանքը քիչ է, գիտնականները կարող են աջակցել այս նախաձեռնությանը:
«Ես ուզում եմ մասնակցել այս ծրագրին, օրինակ՝ վանեցին պետք է ցանկանա Վանի վերաբերյալ ծրագրին մասնակցել»,- ասում է Ռեյմոն Հարություն-Գևորգյանը:
Ըստ նրա, կարևոր է համախմբվել այս ծրագրի շուրջ, կարևոր է, որ հարյուր հազարավոր մարդիկ փոքր գումարներով իրենց լուման ներդնեն այս գաղափարը մեծ ծրագիր դարձնելու համար:
Նախագահը կառավարությանը, վարչապետին և քաղաքապետին առաջարկել է այս հարցը քննարկել: Ըստ նրա, եթե կառավարությունը հաստատի այս գաղափարը, ինքն անձամբ, որպես նախագահ, կլծվի դրամահավաքին և աշխատանքների կազմակերպմանը:
Արմեն Սարգսյանի այս նախաձեռնությանն արդեն արձագանքողներ կան Հայաստանից և աշխարհի տարբեր կողմերից: Ռուսաստանի հայերի միության նախագահ Արա Աբրահամյանն օրերս նշել էր, որ Ռուսաստանի հայերի միության անդամները պատրաստակամությամբ աջակցում են նախաձեռնությանը:
Leave a Reply