ՀՅԴ Եվրոպայի Հայ դատի հանձնախումբը ողջունում է Չեխիայի Սենատի կողմից Հայոց ցեղասպանության բանաձևի միաձայն ընդունումը

ՀՅԴ Եվրոպայի Հայ դատի հանձնախումբը ողջունում է Չեխիայի Սենատի կողմից բանաձևի միաձայն ընդունումը, որը դատապարտում է Հայոց ցեղասպանությունը, ինչպես նաև Օսմանյան կայսրությունում այլ կրոնական և ազգային փոքրամասնությունների ցեղասպանությունը և Երկրորդ աշխարհամարտի ընթացքում նացիստների կողմից իրականացված ոճրագործությունները. այս մասին Yerkir.am-ին հայտնում են հանձնախմբից։

Այս առնչությամբ ՀՅԴ Եվրոպայի Հայ դատի հանձնախմբի հասարակայնության հետ կապերի պատասխանատու Հարութ Շիրինյանն ասել է. «Հատկանշական է, որ 3 տարվա ընթացքում արդեն երկրորդ անգամ Չեխիայի օրենսդիր պալատը պաշտոնապես ճանաչում է Հայոց ցեղասպանությունը: Այս բանաձևը ևս մեկ քայլ է Հայոց ցեղասպանության լիարժեք միջազգային ճանաչման ուղղությամբ: Այս առիթով մենք կոչ ենք անում մնացյալ մի քանի ԵՄ անդամ պետությունների խորհրդարաններին, որոնք դեռևս չեն ընդունել նման բանաձևեր՝ կատարել իրենց հիշատակի պարտականությունը և հորդորել Թուրքիային վերջնականապես ճանաչել Ցեղասպանությունն ու տրամադրել արդար փոխհատուցումներ Հայոց Ցեղասպանության համար»:

Հիշեցնենք՝ մայիսի 20-ին Չեխիայի Խորհրդարանի Սենատը միաձայն ընդունել էր երկու աշխարհամարտերի ընթացքում մարդկության դեմ գործած ոճրագործությունների, այդ թվում՝ Հայոց ցեղասպանության դատապարտմանը նվիրված բանաձևը։ Այն ներկայացվել էր Սենատի փոխնախագահ Միլան Շտյեխի կողմից։

Yerkir.am