Հրանտ Դինքին սպանած Օգյուն Սամասթը 9 ամսից հնարավոր է ազատ արձակվի

2007 թ. հունվարի 19-ին Ստամբուլում «Ակօս» թերթի հիմնադիր և նախկին խմբագիր Հրանտ Դինքին սպանած Օգյուն Սամասթը 9 ամսից հնարավոր է` ազատ արձակվի: Այս մասին տեղեկացնում է Artigercek.com կայքը:

Սամասթը Դինքի սպանության և ապօրինի զենք կրելու և օգտագործելու համար դատապարտվել էր 22 տարի 10 ամսվա ազատազրկման, որը հետագայում կրճատվել է և կազմել 15 տարի 2 ամիս՝ այն հանգամանքով, որ հանցագործության կատարման պահին Սամասթն անչափահաս է եղել:

Հանցագործը բանտում է արդեն 13 տարի 5 ամիս: Ազատազրկման վերջին 1 տարին պայմանական ռեժիմով անցկացնելու օրենքի համաձայն՝ Սամասթը կարող է ազատ արձակվել 9 ամսից:

Տարիներ առաջ Սամասթն ասել էր, որ Դինքի սպանությունը երեք փուլով է տեղի ունեցել, և խոստացել էր սպանության վերաբերյալ մանրամասներ բացահայտել:

Հրանտ Դինքը սպանվել է 2007թ.-ի հունվարի 19-ին` Ստամբուլի Շիշլի թաղամասում գտնվող «Ակօս» թերթի խմբագրատան առջև` 16-ամյա թուրք ազգայնական Օգյուն Սամասթի կրակոցից:

Tert.am