Մեծ Բրիտանիայի արտաքին գործերի նախարարությունը մասնավոր կարգով ճանաչել է, որ Առաջին աշխարհամարտի ժամանակ 1,2 միլիոն հայերի սպանությունը ցեղասպանություն է եղել, բայց չի կարողացել այդ մասին ասել:
Բրիտանացի հայտնի փաստաբան Ջեֆրի Ռոբերթսոնն այս մասին հայտարարել է Harvard Political Review-ի հետ հարցազրույցում:
Ջեֆրի Ռոբերթսոնն իր՝ «Անհարմար ցեղասպանություն» գրքում նշում է, որ 1915 թվականին հայերի պարբերական սպանությունները ցեղասպանություն ճանաչելը աշխարհի համար «անհարմար» է, քանի որ այդ դեպքում Թուրքիան «նյարդային է դառնում»:
Նրա խոսքով՝ Մեծ Բրիտանիայի ԱԳՆ-ն «նյարդային» բառն օգտագործել է մի քանի գաղտնի հուշագրերում, որոնք ինքը ստացել է տեղեկությունների ազատության մասին օրենքի համաձայն:
«Արտաքին գործերի նախարարությունը մասնավոր կարգով ճանաչել է, որ ցեղասպանություն է եղել, բայց չի կարողացել այդ մասին ասել, քանի որ Թուրքիան կսկսի դիվանագիտական եւ տնտեսական բռնաճնշումներ: Թուրքիան ՆԱՏՕ-ի անդամ է, որը մեծ ռազմավարական նշանակությունն ունի, եւ այս պատճառով ԱՄՆ կառավարությունը նույնպես չի կարողանում ճշմարտությունն ընդունել»,- նշել է նա:
Նախագահ Օբաման մշտապես ասում էր, որ սպանությունները ցեղասպանություն կանվանի, սակայն, նախագահ դառնալով՝ օգտագործեց «Մեծ եղեռն» տերմինը, նշել է փաստաբանը՝ հավելելով, որ Դոնալդ Թրամփը, չնայած իր ամբողջ խրոխտությանը, չհամարձակվեց ճշմարտությունն ասել՝ խուսափելով «ցեղասպանություն» բառից:
«Թուրքիան ռազմավարական առումով չափազանց կարեւոր է, եւ նրա նյարդայնությունը չպետք է բորբոքել պատմության մասնավոր նկարագրությամբ»,- ամփոփել է Ռոբերթսոնը:
Artsakhpress.am
Leave a Reply