Հրանտ Դինքին սպանողին ժանդարմերիայում լուսանկարելու հրամանը ես եմ տվել. նախկին հրամանատար

Ստամբուլի ծանր հանցագործությունների գործերով 14-րդ դատարանում շարունակվել է Հրանտ Դինքի սպանության գործով դատավարությունը։

Ինչպես տեղեկանում ենք Ստամբուլի հայկական «Ակօսից», դատական նիստի ժամանակ Սամսունի ժանդարմերիայի այն ժամանակվա հրամանատար Սերդար Յուջելը հեռուստակապով միացել է դատարան եւ հայտնել, որ ժանդարմերիայում Հրանտ Դինքին սպանած Օգյուն Սամասթին լուսանկարելու եւ տեսանկարելու հրամանն ինքն է տվել, սակայն որեւէ բան չի ասել Թուրքիայի դրոշով նկարվելու մասին։

«Ես մամուլում տեսա այդ կադրերը, որտեղ Սամասթը Թուրքիայի դրոշով էր։ Ես դրա հետ կապ չունեմ, բացի այդ՝ մամուլում հայտնված կադրերը մեր նկարածը չէին։ Այն տեղի է ունեցել ժանդարմերիայի թերացման հետեւանքով, որի պատճառով ծառայողական հետաքննություն էի սկսել»,–ասել է նախկին հրամանատարը։

Սամսունի ժանդարմերիայի նախկին հրամանատարի հայտարարությունից հետո դատական նիստը հետաձգվել է։

https://news.am/arm/news/561252.html