Ստամբուլում լույս է տեսել հայ պատմաբան Արսեն Ավագյանի «Մութ մնացած մի գործիչ․ երիտթուրք կոմունիստ Սալիհ Զեքին (Կուշարկովը)» վերնագրով գիրքը

Ստամբուլում Թուրքիայի սոցիալական և պատմական ուսումնասիրությունների հիմնադրամի կողմից տպագրվել է հայ պատմաբան, պատմական գիտությունների դոկտոր, պրոֆ․ Արսեն Ավագյանի «Մութ մնացած մի գործիչ՝ երիտթուրք կոմունիստ Սալիհ Զեքին (Կուշարկովը)» մենագրությունը։ Այդ մասին հաղորդում է Akunq.net-ը՝ վկայակոչելով հիմնադրամի կայքէջում հրապարակված տեղեկությունը։

Աղբյուրի համաձայն՝ սույն գրքում Արսեն Ավագյանն անդրադառնում է ոչ միայն Թուրքիայում կոմունիստական շարժման պատմության, այլ նաև՝ Հայոց ցեղասպանության իրագործման մեջ էական դեր ունեցած Սալիհ Զեքիին։ Հիշեցնենք, որ վերջինս Մեծ եղեռնի տարիներին եղել է Դեր Զոր սանջակի՝ մարզի կառավարիչը։ Հետագայում Սալիհ Զեքին դարձել է Թուրքիայի կոմունիստական կազմակերպության հիմնադիր ղեկավարը։

Մենագրության շնորհիվ առաջին անգամ գիտական շրջանառության մեջ են դրվում Օսմանյան վարչապետարանի արխիվի և Ռուսաստանի պետական քաղաքական և սոցիալական պատմության արխիվի այն փաստաթղթերը, որոնցում ներկայացված են Սալիհ Զեքիի ծննդյան և մահվան իրական տարեթվերը, ինչպես նաև՝ նրա անձին վերաբերող այլ էական մանրամասներ։

Հեղինակն այս արժեքավոր ուսումնասիրության միջոցով էական ներդրում է կատարում Հայոց ցեղասպանության պատմության և Թուրքիայի Հանրապետության հիմնադրման գործընթացի մասին ուսումնասիրությունների մեջ։

Թարգմանեց Մելինե Անումյանը

Akunq.net