Թուրքիայի նախագահ Ռեջեփ Թայիփ Էրդողանը հաստատել է Թուրքիայի և Լիբիայի ազգային համաձայնության կառավարության միջև ռազմական համագործակցության վերաբերյալ հուշագիրը: Այս մասին տեղեկացնում է Resmi Gazete պարբերականը:
Այսպիսով՝ փաստաթուղթը Թուրքիայի կողմից վերջնականապես վավերացվել է:
Ավելի վաղ փաստաթուղթը հավանության էր արժանացել Թուրքիայի խորհրդարանի և Թուրքիայի միջազգային գործերի հանձնաժողովի կողմից:
Թուրքիայի և Լիբիայի ազգային համաձայնության կառավարության միջև ռազմական համագործակցության վերաբերյալ համաձայնագիրը ստորագրվել է նոյեմբերի 28-ին, Ստամբուլում: Այն նախատեսում է զինծառայողների վերապատրաստում և ուսուցում, իրավական բազայի ձևավորում, ինչպես նաև երկու երկրների զինծառայողների հարաբերությունների ամրապնդում:
Երկու կողմերի միջև ստորագրվել էր նաև ծովային սահմանների վերաբերյալ փոխըմբռնման հուշագիր, որն արժանացել է Հունաստանի կտրուկ արձագանքին:
Լիբիայում երկիշխանություն է տիրում՝ արևելքում իշխում է ընտրված խորհրդարանը, իսկ Տրիպոլիում, այսինքն՝ արևմուտքում՝ ՄԱԿ-ի և ԵՄ-ի աջակցությամբ կազմավորված կառավարությունը: Արևելյան հատվածի իշխանությունները գործում են Տրիպոլիից անկախ և համագործակցում են Լիբիական ազգային բանակի հետ:
Leave a Reply