Միացեալ Նահանգներու արտաքին գործոց նախարարութեան պաշտօնական ներկայացուցիչը երեքշաբթի, 17 դեկտեմբերին, վերջապէս մեկնաբանեց անցեալ շաբաթ Ծերակոյտին կողմէ թիւ 150 բանաձեւին ընդունումը, որմով ամերիկացի ծերակուտականները 1915-ի ջարդերը Ցեղասպանութիւն որակած էին:
«Ամերիկեան վարչակազմին դիրքորոշումը անփոփոխ է: Մեր մօտեցումը կ՛արտացոլայ այս տարուան Ապրիլին Միացեալ Նահանգներու նախագահին արտայայտած յայտարարութեան մէջ»,- արտաքին գործոց նախարարութեան պաշտօնական կայքին վրայ զետեղուած մեկնաբանութեան մէջ կը նշէ նախարարութեան մամլոյ ծառայութեան ղեկավար Մորկըն Օրթըկըս: Այս մասին կը հաղորդէ «Ազատութիւն»-ը։
Յիշեցնենք, որ բանաձեւին հաստատումէն ետք, Թուրքիոյ արտաքին գործոց նախարարութիւն կանչուած Անգարայի մօտ Միացեալ Նահանգներու դեսպանը եւս նման յայտարարութիւն մը կատարած էր, իսկ այս տարուան Ապրիլ 24-ին՝ Հայոց Ցեղասպանութեան տարելիցին առթիւ հրապարակուած ուղերձին մէջ, նախագահ Տանըլտ Թրամփ 1915-ի իրադարձութիւնները անուանած էր «Մեծ Եղեռն», դարձեալ խուսափելով «ցեղասպանութիւն» բառը օգտագործելէ:
Yerakouyn.com
Leave a Reply