Կ․Պոլսում գործող «Մարալ» հայկական ժողովրդական պարային համույթը նշում է իր 40-ամյա հոբելյանը

Անատոլիական և հայկական ժողովրդական պարային համույթը՝ «Մարալ» երգ-պարի համույթը, պատրաստվում է իր 40-ամյա հոբելյանին նվիրված միջոցառմանը։

Համույթը դեկտեմբերի 15-ին ելույթ է ունենալու Ստամբուլի «Կոնգրես» կենտրոնում։ Համույթի գեղարվեստական ղեկավար Կարպիս Չափքանն Անադոլու գործակալության թղթակցին տված հարցազրույցում նշել է, որ  1980 թ․ ստեղծված խումբը կիրակի օրը տոնական համերգ է տալու՝ տոնելով հիմնադրման 40 ամյակը։

Նա տեղեկացրել է, որ  180 հոգուց բաղկացած «Մարալ» երգի-պարի համույթը հայկական համայնքում գործող միակ համույթն է և հավելել․ «Մենք էլ այդ մշակույթը պահպանում ենք արդեն 40 տարի, ինչի համար շատ ուրախ ենք։  Կիրակի օրվա միջոցառմանը հատուկ պատրաստվել ենք։ Հայաստանից 12 հոգուց բաղկացած նվագախումբ է եկել։ Նրանք 15 օր մեզ հետ փորձ են անելու։ «Մարալը» սիրողական խումբ է։ Պարողների մեծ մասն աշակերտներ են։ Նրանք իրենց ժամանակի մեծ մասն այստեղ են անցկացնում։ Միասին փորձում ենք ինչ-որ բաներ անել։ Հուսով ենք՝ երկար ժամանակ այս միասնությունը կպահպանվի»։

Աշխատում ենք արհեստավարժ ոգով

«Մարալ» երգի-պարի համույթի անդամներից  Հարման Բիբերյանը հայտնել է, որ 20 տարի է, ինչ համույթի անդամ է։ Նա նշել է, թե շատ ոգևորված է խմբի 40 ամյակի կապակցությամբ, ապա՝ հավելել․ «Սիրողական խումբ ենք, սակայն աշխատում ենք արհեստավարժ ոգով։ Ես և ընկերներս ամեն ինչ անում ենք, որ այս խումբը շարունակի գործել։ Աստծով, մեր խմբի 40 ամյակը նշելու ենք շատ յուրահատուկ ներկայացմամբ։ Չնայած 20 տարի է, ինչ պարում եմ, դեռ առաջին օրվա պես շատ հուզված եմ լինում։ Ես փորձում եմ այս սերը վառ պահել իմ մեջ»։

Համույթի անդամ Նաիրա Մարգարօղլուն ասել է, որ «Մարալ» խումբը նշում է իր հիմնադրման 40 ամյակը, իսկ ինքը՝ խմբին անդամակցելու 20-ամյակը։ Նա շեշտել է, որ 20 տարվա ընթացքում խումբը շատ լավ բաների է հասել, ապա՝ ավելացրել․ «Շատ ուրախ եմ՝ տեսնել, թե խումբը ուր է հասել․ մեզ համար երանություն է, որ մեր մշակույթը պահպանում ենք բեմի վրա, ինչպես նաև՝ երջանկություն է, որ խումբը տարեցտարի ուժեղանում է։ Մենք այստեղ ամեն օր փորձ ենք անում, ոչ մեկ չի տեսնում։ Մեզ տեսնելու են ելույթի օրը, ինչը մեզ համար շատ հուզիչ է։ Շատ լավ զգացողություն է բեմ բարձրանալը»։

https://www.evrensel.net/haber/392853/ermeni-halk-dans-toplulugu-40inci-yilini-kutluyor?fbclid=IwAR0GtX9ZiUaYwHAjkQtgaXi9GeWh-Exox53xPbdrOuBHaawpCzrml13WObk

Թարգմանեց Անի Մելքոնյանը

Akunq.net