ԵՐԵՒԱՆ, «Արմէնփրէս».- Իսրայէլցի երկու նշանաւոր քաղաքական գործիչներ կոչ ըրին երկրի իշխանութիւններուն, որ ճանաչնան Հայոց Ցեղասպանութիւնը՝ հետեւելով Միացեալ Նահանգներու Ներկայացուցիչներու տան օրինակին:
Արդարեւ, «Կապոյտ եւ սպիտակ» կուսակցական դաշինքի առաջնորդներէն Եաիր Լապիտ գրեց հետեւեալը. «Ներկայացուցիչներու տան կողմէ Հայոց Ցեղասպանութիւնը ճանաչցող քուէարկութիւնը ուղղուած էր պատմական արդարութեան եւ ճշմարտութեան: Թուրքիոյ պէտք չէ արտօնել, որ ահաբեկէ աշխարհը՝ պնդելով Ցեղասպանութեան ժխտումին վրայ։ Պիտի շարունակեմ Իսրայէլի կողմէ Հայոց Ցեղասպանութիւնը ճանչնալու պայքարը»։
Իր կարգին, Իսրայէլի ներքին գործոց նախկին նախարար Կիտոն Սաար՝ «Լիքուտ» կուսակցութենէն, Ցեղասպանութիւնը ճանաչնալու կոչ ըրաւ՝ ողջունելով Ներկայացուցիչներու տան «բարոյական եւ սկզբունքային կեցուածքը»՝ աւելցնելով. «Իսրայէլ եւս պէտք է յստակօրէն ճանչայ այս սարսափելի վայրագութիւնները»։
Asbarez.com
Leave a Reply