Թուրքիայի նախագահ Ռեջեփ Թայիփ Էրդողանը հայտնել է Սիրիայի հյուսիսում ռազմական գործողությունը վերսկսելու պայմանը: Այս մասին տեղեկացնում է թուրքական NTV հեռուստաալիքի կայքը:
«Մենք շատ կարևոր քայլ արեցինք այս օպերացիայով՝ ապահովելով մեր երկրի անվտանգությունն ու Սիրիայի տարածքային ամբողջականությունը: ԱՄՆ-ի հետ հինգշաբթի օրվա մեր համաձայնությունը մեր դիվանագիտական հաջողության արտացոլանքն է: Ես կրկնում եմ՝ ԱՄՆ-ի հետ համաձայնությամբ մեր հայտարարած անվտանգության գոտին պետք է մաքրվի 120 ժամվա ընթացքում, և այդ ժամանակը սկսվել է հինգշաբթի երեկոյից»,- ասել է նա:
Ըստ նրա՝ Թուրքիան պայմանավորվել է ԱՄՆ-ի և «ոչ թե ահաբեկիչների» հետ:
«32 կմ հյուսիսից հարավ և 444 կիլոմետր Իրաքի սահմանից մինչև Ջերաբլուս ընկած հատվածն անվտանգության գոտի է, և մենք այն կպաշտպանենք: Ահաբեկիչների՝ այս տարածքից դուրս չգալու դեպքում մենք կշարունակենք գործողությունը»,- ասել է Էրդողանը:
Հիշեցնենք, որ հոկտեմբերի 9-ին Թուրքիան հայտարարել է Սիրիայում ռազմական գործողության մեկնարկի մասին, որի արդյունքում երկիրն արդեն հարվածներ է հասցրել սիրիական Թել Աբյադ, Ռաս էլ Այն քաղաքներին ու այլ բնակավայրերի: Նպատակը տարածքը «ՔԱԿ-ի ահաբեկիչներից մաքրելն է», այնտեղ անվտանգության գոտի ստեղծելն ու 3-4 միլիոն սիրիացի փախստականներին այնտեղ բնակեցնելը:
Leave a Reply