Եվրոպական Միությունն Անկարային կոչ է արել դադարեցնել ռազմական գործողությունները Սիրիայի հյուսիս-արևելքում: Այս մասին հայտնում է «Известия»-ն` վկայակոչելով Եվրամիության դիվանագիտության ղեկավար Ֆեդերիկա Մոգերինիին:
«Սիրիայի հյուսիս-արևելքում Թուրքիայի ռազմական գործողությունների ֆոնին ԵՄ-ն հաստատում է, որ սիրիական հակամարտության կայուն լուծման հնարավոր չէ հասնել ռազմական ճանապարհով: ԵՄ-ն կոչ է անում Թուրքիային դադարեցնել միակողմանի ռազմական գործողությունները»,- Մոգերինիի խոսքերը մեջբերում է գործակալությունը:
Մոգերինին նշել է նաև, որ ԵՄ-ն օգնություն չի ցուցաբերի կայունացման կամ այն շրջանների զարգացման հարցում, որտեղ տեղի բնակչության իրավունքներն անտեսվում են:
Հիշեցնենք, որ սիրիացի քրդերի և «Իսլամական պետության» դեմ ռազմարշավ սկսելու մասին ավելի վաղ հայտարարել էր երկրի նախագահ Ռեջեփ Թայիփ Էրդողանը։
Թուրքիայի ԱԳ նախարար Մևլյութ Չավուշօղլուն, իր հերթին, հայտարարել էր, որ «Խաղաղության աղբյուր» անվանումն ստացած ռազմարշավն սկսելուց առաջ թուրքական կողմը տեղեկացրել է Սիրիայի կառավարությանը՝ նոր անդրսահմանային գործողության մեկնարկի մասին։
Leave a Reply