«Էրդողանը մտահոգված է նախկին արտգործնախարար Դավութօղլուի հնարավոր առաջընթացով». Դավութօղլուի համակիրներ

Թուրքիայի նախկին արտգործնախարար Ահմեթ Դավութօղլուն, որն իր համակիրների հետ միասին պատրաստվում է նոր կուսակցություն հիմնել, իշխող Արդարություն և զարգացում կուսակցությունից (ԱԶԿ) հեռացվելու է կուսակցության ներքին կանոնադրության 117-րդ հոդվածի 7-րդ կետի հատկանիշներով, մասնավորապես՝ «Կուսակցության ղեկավարների, անդամների կամ կուսակցության վերաբերյալ հանրությանն իրականությանը չհամապատասխանող տեղեկություններ տարածելու, զրպարտիչ, վիրավորական, սևացնող և նվաստացնող հայտարարություններ» անելու համար:

Ահմեթ Դավութօղլուի համակիրներից Այհան Սեֆեր Ուսթյունը, ում հեռացվելու հարցը նույնպես բարձրացվել է, ըստ Artigercek.com կայքի, նշել է. «Եթե ԱԶԿ-ն հեռացած չլիներ հիմնադիր սկզբունքներից, հաշվի կառներ մեր կառուցողական զգուշացումները: Ցավոք, (թուրք ազգայնական գործիչ-Tert.am) Դողու Փերինչեքի հետ ձեռք ձեռքի տվածները, ահաբեկչական խմբավորման ղեկավարից օժանդակություն ակնկալողները չկարողացան հանդուրժել իրենց ընկերների իրավացի զգուշացումները: Եթե մի շարժում իր գլխավոր ղեկավարին, իր զավակներին «ուտում» է, արդեն հանրության դատին եմ թողնում գնահատել, թե այս շարժումն ուր է գլորվել և դեպի ուր է շարժվում»:

Ըստ Դավութօղլուի թիմի՝ նախագահ Ռեջեփ Թայիփ Էրդողանը գնացել է Դավութօղլուի վարկանիշի դեմ գործողություններ կատարելու՝ մտահոգվելով նրա հնարավոր հետագա առաջընթացից, ինչը երևում է մասնավորապես Քոնիայում Էրդողանի հանրահավաքին ցածր մասնակցության ցուցանիշներից:

Վերջին շրջանում Դավութօղլուին ԱԶԿ-ում անվանում էին «դավաճան», որին ի պատասխան նա նշել է. «Եթե ահաբեկչության դեմ պայքարի հարցում «տետրերը բացվեն», բազմաթիվ մարդիկ «մարդու երես չեն տեսնի»»:

Դավութօղլուն Թուրքիայի վարչապետն է դարձել 2014 թվականին՝ 5 տարի ԱԳ նախարարի պաշտոնը զբաղեցնելուց հետո, սակայն 2016 թվականին նա անսպասելիորեն վիճել է Էրդողանի հետ, ինչից հետո հրաժարական է տվել:

https://www.tert.am/am/news/2019/09/04/davutoglu-erdogan/3085506