Դունյա Միյատովիչն անհանգստացած է Թուրքիայի դատական համակարգում առկա խնդիրներով

Եվրոպայի խորհրդի մարդու իրավունքների հանձնակատար Դունյա Միյատովիչը հայտնել է, որ Թուրքիայում դատական համակարգի անկախությունը լուրջ սպառնալիքի տակ է:

Այս մասին, ինչպես հաղորդում է «Արմենպրես»-ը, հայտնում է «Deutsche Welle» լրատվամիջոցը:

Միյատովիչը հրապարակել է, որ Թուրքիայում 2016 թ․ ռազմական հեղաշրջման փորձից հետո երկրում հաստատված արտակարգ իրավիճակի ժամանակաշրջանում թուրքական դատական համակարգը լուրջ վնաս է կրել: Նա իր անհանգստությունն է հայտնել այդ հարցի շուրջ:

«Որոշ կառավարություններ և քաղաքական գործիչներ, դատական համակարգի անկախությունը, անկողմնակալությունը պահպանելու փոխարեն, միջամտում են դատական գործընթացներին և նույնիսկ դատավորների նկատմամբ սպառնալիքներ են կիրառում»,- նշել է նա:

Միյատովիչն ընդգծել է, որ այս հարցի ուղղությամբ եվրոպական կառույցները պարտավոր են քայլեր ձեռնարկել:

Armenpress.am