Պաշտոնապես Թուրքիայի միակ հայկական գյուղը համարվող Վաքըֆլըում հայերը նշել են Սուրբ Աստվածածնի վերափոխման տոն

Պաշտոնապես Թուրքիայի միակ հայկական գյուղը համարվող Վաքըֆլըում Սուրբ Աստվածածնի վերափոխման տոնի առթիվ պատարագ է մատուցվել։ Պատարագի ընթացքում կատարվել է նաև խաղողօրհնեք։ Տոնին մասնակցել են թե նշյալ գյուղի և թե Թուրքիայի այլ շրջանների հայ բնակիչները, ինչպես նաև՝ Հայաստանից և Սփյուռքից եկած հայեր։ Հիմնականում մուսալեռցիներից բաղկացած Վաքըֆլըի գյուղացիները կազմակերպել են նաև հարիսայի հյուրասիրություն։

Այդ մասին, ըստ Akunq.net-ի, հաղորդում են թուրքական լրատվամիջոցները։

Համաձայն աղբյուրի՝ այս տարվա պատարագին մասնակցել են ոչ միայն հայեր, այլ նաև՝ ալևի բնակիչներ։ Ալևիները հայերին օգնել են մեծ կաթսաներում հարիսա պատրաստել, ինչպես նաև՝ հայերի հետ միասին աղոթել։

Վաքըֆլը գյուղի հայկական համայնքի ղեկավար Ջեմ Չափարի խոսքով՝ այս անգամ Հայ առաքելական եկեղեցու 5 տաղավար տոներից մեկը եղող Մարիամ Աստվածածնի վերափոխման տոնը համընկել է ալևիների մի տոնի հետ, որն էլ առիթ է եղել, որ միասին անեն տոնակատարությունները։

Հայ հոգևորականներից Ավետիս Թաբաշյանը հայտնել է, որ իրենց աղոթքներն ուղղված են եղել Թուրքիայում «եղբայրական սիրո» պահպանմանը։  Պատարագին մասնակցել է նաև Պոլսո հայոց պատրիարքի փոխանորդ եպիսկոպոս Սահակ Մաշալյանը, ով մասնավորապես նշել է․

«Այո, մենք ցանկանում ենք պահպանել մեր ավանդույթները։ Ձգտում ենք մեր այս ամենավերջին գյուղում՝ Վաքըֆլըում, ապրեցնել Անատոլիայի հայկական մշակույթը։ Մաղթում եմ, որ այս պատարագի ընթացքում հնչած խաղաղության և սիրո մեր ուղերձները տարածվեն ամբողջ երկրում և աշխարհում»։

Լուսանկարը՝ Իվան Արդհալջյանի

https://www.haberler.com/vakifli-da-meryem-ana-yortusu-kutlandi-12338563-haberi/

Թարգմանեց Մելինե Անումյանը

Akunq.net