Թուրքիայի հայ համայնքը և իշխանություններն ունեն նույն ցանկությունը, որ պատրիարքական ընտրություններն անցկացվեն ամենամոտ ապագայում և կատարյալ արդարությամբ. Սարո Բենգլյան

Tert.am-ը Պոլսո պատրիարքական ընտրությունների նախապատրաստական գործընթացի մասին զրուցել է ընտրությունների կազմակերպմամբ զբաղվող նախաձեռնող մարմնի մամուլի խոսնակ, իրավաբան Սարո Բենգլյանի հետ:

-Պարոն Բենգլյան, նախատեսվում են Պոլսո պատրիարքական ընտրություններ: Թուրքիայի իշխանությունները պետք է առաջարկեն ընտրությունների անցկացման կանոնադրությունը, սակայն համայնքն ինքն էլ կարող է իր առաջարկները ներկայացնել: Ի՞նչ փուլում է գործընթացը, համայնքն ունի՞ իր առաջարկները:

-Նոր թափով, աշխույժ կերպով սկսվեց Պոլսո 85-րդ պատրիարքի ընտրության նախաձեռնող մարմնի, իր դիվանի անդամների անունների կազմման գործընթացը: Այդ մասին եղած տեղեկատվությունը փոխանցվեց տեղի իշխանություններին: Առաջիկայում ընտրության շրջանը արդյունաբեր և ժողովրդավար կերպով ապահովելու համար պատկան մարմինների հետ երկխոսություն և գաղափարների փոխանակման շրջան պետք է սկսվի, իշխանություններին պետք է ներկայացնենք մեր առաջարկները: Վստահ ենք, որ նրանք նկատի պիտի առնվեն իշխանությունների կողմից և մեր նախաձեռնած գործընթացն առաջ կգնա և ի կատար կածվի:

-Ի՞նչ պետք է համայնքը կարևորի կանոնադրության մեջ, ի՞նչ կետեր պետք է ավելացվեն:

-Այժմ որոշ քննարկումներ են կազմակերպվում և մեկնաբանություններ են արվում մեր նախաձեռնակ մարմնի իրավաբանների կողմից (որոնց մեջ ես էլ եմ մտնում)`նկատի առնելով զանազան տարբերակներն ու առկա իրավիճակը: Կանոնադրության վերջնական ձևը կլինի իշխանությունների հետ կայանալիք երկխոսության և գաղափարների հետ փոխանակման արդյունքում:

– Հատկապես կարևորվում է թեկնածուների առաջադրման գործընթացը․ կա՞ պատկերացում, թե ովքեր կարող են լինելու Պոլսո պատրիարքի թեկնածուները՝ միայն Թուրքիայում ծնվածնե՞րը, թե՞՝ նաև նրանք, ում հայրերն են եղել Թուրքիայից:

-Այս կետն էլ պետք է առաջիկայում քննարկվի իշխանությունների հետ կայանալիք բանակցությունների և երկխոսության ժամանակ: Ինչպես իշխանությունների կողմից տրամադրվելիք կանոնադրության շատ կետեր, այնպես էլ այս շատ կարևոր հարցը մեզ ուղեցույց պետք է լինի:

-Պոլսո պատրիարքի տեղապահ ընտված Սահակ եպիսկոպոս Մաշալյանը նշել էր, որ ամենայն հավանականությամբ, ընտրությունները կանցկացվեն աշնան սկզբին: Հնարավո՞ր է՝ դրանք հետաձգվեն՝ կանոնադրության պատրաստման գործընթացի հետաձգման պատճառով:

-Ես անձնապես, չեմ կարծում, որ որևէ հետաձգում կլինի: Այդպես կարծում են համայնքային բոլոր շրջանակները, տեղի իշխանությունները. բոլորն էլ նույն ցանկությունն ունեն և բոլորն էլ բարի կամեցողություն են դրսևորում, որ պատրիարքական ընտրություններն անցկացվեն ամենամոտ ապագայում և կատարյալ արդարությամբ:

– Արդյոք հիմա բանակցություններ և քննարկումներ կա՞ն Թուրքիայի իշխանությունների հետ՝ ընտրությունների հետ կապված: Ինչպիսի՞ն է նրանց տրամադրվածությունը: Կարծում եք՝ միջամտություններ շատ կլինե՞ն:

-Հիմա հնարավոր չէ խոսել պատկան իշխանությունների կողմից որևէ ճնշման և միջամտության մասին: Ինչպես արդեն ասացի՝ համայնքի և պետության նպատակը նույնն է, և մենք հավատում ենք այդ նպատակին. գործընթացը պետք է առաջ գնա արագորեն, ժողովրդավարության, թափանցիկության, արդարության սկզբունքներին լիակատար հետևելով՝ առանց պատկան մարմինների որևէ միջամտության: Այս է համայնքի հույսն ու փափագը:

Հեղինակ` Հռիփսիմե Հովհաննիսյան

https://www.tert.am/am/news/2019/07/29/Saro-Benglyan/3059714