Թուրքիոյ Լաւ կուսակցութեան ղեկավար Մերալ Աքշեներ յայտնած է, որ ուժեղացուած խորհրդարանական համակարգը Թուրքիոյ համար աւելի նպատակայարմար պիտի ըլլայ: Ան անդրադարձած է նաեւ Թուրքիոյ նախկին նախագահ Ապտիւլլա Կիւլի ստեղծելիք կուսակցութեան: Այս մասին կը հաղորդէ թրքական «Ենի չաղ» թերթը:
«Կը կարծեմ, որ նախագահական կամ կիսանախագահական համակարգի փոխարէն անհրաժեշտ է կիրարկել աւելի ժողովրդավարական համակարգ: Գործող համակարգը որդեգրուած է արագօրէն եւ բաւարար չափով չէ քննարկուած հասարակութեան շրջանակին մէջ», նշած է ան:
Աքշեներ նաեւ անդրադարձած է Թուրքիոյ 11-րդ նախագահ Ապտիւլլա Կիւլի եւ նախկին փոխվարչապետ, տնտեսութեան նախարար Ալի Պապաճանի կողմէ նոր կուսակցութիւն հիմնելու նիւթին:
«Կը հաւատամ, որ նոր կուսակցութիւնը յաջողութիւններ պիտի արձանագրէ եւ ընտրողներու համար իբրեւ այլընտրանք պիտի ծառայէ», եզրափակած է ան:
Ալի Պապաճան 8 յուլիսին յայտնած էր իշխող Արդարութիւն եւ բարգաւաճում կուսակցութենէն հեռանալու մասին:
Կը նախատեսուի, որ ան գարնան Կիւլի հետ հիմնէ նոր կուսակցութիւն:
Leave a Reply