Երէկուան մեր թիւով հաղորդած էինք, որ «Մեթրոփոլիս Ամփիր Սոֆիլ» շարժապատկերի սրահին մէջ առաջին անգամն ըլլալով ցուցադրուեցան Խաչատուրեան ընտանիքին նախաձեռնած եւ Աշոտ Առաքելեանի բեմադրած «Կիլիկիա` առիւծներու երկիր» եռամաս ժապաւէնին նախագծային հատուածները: Այս առիթով «Ազդակ»-ի խմբագրատուն այցելեցին եւ տնօրէնութեան հետ տեսակցեցան ժապաւէնի բեմադրիչ եւ «Տոմինօ փրոտաքշըն»-ի հիմնադիր Աշոտ Առաքելեան, ԳՈՀԱՐ-ի ընտանիքի անդամներէն` Շահէ Խաչատուրեան եւ ԳՈՀԱՐ-ի գործադիր տնօրէն եւ ժապաւէնի արտադրող Սեւակ Սերոբեան:
Խորհրդակցութիւնը կը վերաբերէր ժապաւէնի նախագիծի մշակման մասնագիտական մանրամասնութիւններուն, կատարողականութեան բարձրագոյն որակին, բեմագրական եւ բեմադրական արհեստավարժութեան, միջազգային ֆիլմարուեստի առումով անոր ներկայացուցած մրցունակութեան եւ հայկական իրականութեան մէջ անոր բերած շարժապատկերային նոր մշակոյթին ու արուեստին: Հանդիպումը առիթ էր նաեւ խօսելու ԳՈՀԱՐ-ի հետագայ ծրագիրներուն եւ «Ազդակ»-ի հետ համագործակցութեան անցած եւ գալիք ուղիներուն մասին:
Leave a Reply