ԱՄՆ կոնգեսական Ջեքի Սփիրն ու Քիմ Քարդաշյանը համատեղում են Հայոց ցեղասպանության ճանաչման ջանքերը

Ամերիկյան ռեալիթի շոուի աստղ Քիմ Քարդաշյանը ծավալուն հարցազրույց է տվել The Wall Street Journal-ին, որում նաև ասել է, որ ցանկանում է Հայոց ցեղասպանության ճանաչումը դարձնել իր առաքելությունը։

Քիմը, ով զբաղվում է ԱՄՆ-ում քրեական արդարադատության բարեփոխումների հարցերով, ասում է, որ ցանկանում է ուշադրությունը կենտրոնացնել Ցեղասպանությանն ու վերջերս հաղորդագրություն է ուղարկել ԱՄՆ նախագահ Դոնալդ Թրամփի փեսային՝ Ջարեդ Քուշներին, ով նաև նախագահի խորհրդականն է՝ խնդրելով քննարկել հարցը։

«Ես ցանկանում եմ այն (Ցեղասպանության ճանաչումը․–խմբ․) դարձնել իմ առաքելությունը։ Հայրիկս շատ կհպարտանար»,-ասել է Քիմը՝ նկատի ունենալով ամերիկահայ իրավաբան Ռոբերտ Քարդաշյանին։

WSJ–ը նաև հայտնում է, որ Հայոց ցեղասպանության ճանաչման հարցով Քիմ Քարդաշյանին է զանգահարել կոնգրեսական Ջեքի Սփիրը՝ ակնկալելով այս հարցում Քարդաշյան-Ուեսթի աջակցությունը։ Եթե դու կարողանաս հասնել նրան, որ նախագահը ճանաչի ցեղասպանությունը, այն կլինի բեկումնային՝ Կոնգրեսում ցեղասպանության բանաձևերի ընդունման համար»,-ասել է Ջեքի Սփիրը Քարդաշյանին։

Նշվում է, որ 3 օրից Քարդաշյանը լինելու է Սպիտակ տանը՝ քննարկելու քրեական արդարադատության հետ կապված հարցերը և խոստացել է նաև անդրադառնալ Հայոց ցեղասպանության հարցին։

Panorama.am