Թուրքիայի մի քանի քաղաքներում տեղի ունեցած քաղաքապետի ընտրություններից հետո մի շարք ապրանքներ թանկացել են: Այս մասին Tert.am-ի հետ զրույցում ասաց թուրքագետ Հակոբ Չաքրյանը:
Նա նշեց, որ շաքարավազը, թեյը, էլեկտրականությունը և այլ սպառման ապրանքների գները բարձրացան, սպասվում է նաև վառելանյութի թանկացում`16-20 տոկոսով: «Էրդողանը հետաձգում էր թանկացումները, մտածում էր, որ դա դժգոհություն կառաջացնի ժողովրդի մոտ, ու ավելի դժվար ձայներ կհավաքեն, բայց ընտրություններից հետո, երբ այլևս չկա մարդկանց ձայները հավաքելու խնդիր, սկսել են ապրանքները թանկացնել»,- ասաց Չաքրյանը:
– Մի քանի օր առաջ Թուրքիայում տեղի ունեցած քաղաքապետի ընտրությունների արդյունքում Ստամբուլում հաղթեց ընդդիմադիր Ժողովրդահանրապետական կուսակցության թեկնածու Էքրեմ Իմամօղլուն: Թեև նախագահ Ռ. Թ. Էրդողանը շնորհավորեց նրան, բայց արդյոք չկա՞ն հետընտրական զարգացումներ:
– Իհարկե կան: Այս ընտրությունների արդյունքները վկայեցին, որ նախագահ Էրդողանն էլ առաջվա ժողովրդավարությունը չունի, որ իր հեղինակությունը օրըստօրե նվազում է: Պատահական չէ, որ համաշխարհային մամուլը գրում էր այն մասին, որ սա ոչ այնքան Իմամօղլու հաղթանակն է, որքան Էրդողանի անձնական պարտությունը, որովհետև վերջինս, լինելով երկրի նախագահը, իր թեկնածուի համար քարոզարշավ էր անցկացնում:
Հրապարակից հրապարակ շրջում էր, վիրավորական արտահայտություններ էր անում, Իմամօղլուին համեմատում էր Եգիպտոսի բռնապետ նախագահի հետ, երբ նա լիբերալ է: Մրցակցությունը չէր ծավալվում թեկնածուների միջև, մրցակցությունը Էրդողանի ու Իմամօղլուի միջև էր:
Բացի այս, ընտրություններից հետո տեղի ունեցավ մի կարևոր իրադարձություն. մի քանի քաղաքական գործիչ, այդ թվում՝ Գյուլը, որոշել են ստեղծել նոր կուսակցություններ: Նրանք հայտարարեցին, որ սեպտեմբերին պաշտոնապես կհայտարարեն կուսակցությունների ստեղծման մասին: Եթե պատգամավորներից ոմանք միանան այս կուսակցություններին, նրանք խորհրդարանում կունենան խմբակցություն, ու Էրդողանի խմբակցությունը կմասնատվի:
Ընտրություններից հետո նկատվեց ևս մեկ միտում՝ տեղի ունեցան թանկացումներ: Շաքարավազը, թեյը, էլեկտրականությունը և այլ սպառման ապրանքների գները բարձրացան: Սպասվում է նաև վառելանյութի թանկացում 16-20 տոկոսով: Էրդողանը հետաձգում էր թանկացումները, մտածում էր, որ դա դժգոհություն կառաջացնի ժողովրդի մոտ, ու ավելի դժվար ձայներ կհավաքեն, բայց ընտրություններից հետո, երբ այլևս չկա մարդկանց ձայները հավաքելու խնդիր, սկսել են թանկացնել ապրանքները:
– Էրդողանն ասում էր, թե «նա, ով հաղթում է Ստամբուլում, հաղթում է ամբողջ Թուրքիայում»: Ստամբուլի օրինակը կվարակի՞ մյուս քաղաքները:
– Միանշանակ: Էրդողանի կուսակցությունը միայն Ստամբուլում չի պարտվել, նրանք պարտվել են Անկարայում, Անթալիայում և խոշորագույն այլ քաղաքներում: Դրանից հետո սկսել են քննարկել խորհրդարանական վաղաժամկետ ընտրություններ անցկացնելու հարցը, որովհետև Ստամբուլի ընտրությունները որակվում են որպես «անվստահություն Էրդողանին»:
– Միշտ խոսվել է, որ Թուրքիայում ընտրություններն ազատ չեն, ինչպե՞ս ստացվեց, որ իշխանությունը պարտվեց. լծակները գործի չէի՞ն դրել:
– Ընտրություններն այդքան էլ ազատ չէին, բայց ընտրությունների արդյունքները չեղյալ հայտարարելուց հետո մարդիկ զայրացան, Էրդողանի հայտարարություններն էլ ժողովրդին զայրացրին, մարդիկ չէին հասկանում՝ ինչ է խոսում:
– Իմամօղլուն հայերի նկատմամբ ինչպե՞ս է տրամադրված:
– Նա միշտ հայտարարում է, թե հավասար է վերաբերվում բոլորին, իր համար նշանակություն չունի՝ հայ կլինի, թե թուրք, բոլորը իր քաղաքացիներն են, և պետք է վերջ տալ ազգայնամոլության դրսևորումներին: Չգիտեմ՝ ինչ կանի, բայց հուսով եմ՝ խոսքի տերը կլինի: Ստամբուլում 55,000 հայ է մնացել: Նրանց համար, ըստ էության, տարբերություն էլ չկա՝ ով կլինի, արտոնություններ չեն ստանալու, կարգավիճակը չի փոխվելու… Հայերը արհամարհված են իշխանության կողմից, պատրիարքարանի կողմից:
Հեղինակ` Տիգրանուհի Մարտիրոսյան
Leave a Reply