Հավանական է վերականգնվի Կիլիկիայի հայկական Օշինի դղյակը

Ներկայիս Թուրքիայի Մերսին նահանգի Չամլըյայլա գավառում ավերակ վիճակում գտնվող Կիլիկիայի հայկական Օշինի դղյակը (թուրք. անվանումը` Սինապի ամրոց) վերականգման կարիք ունի: Այդ մասին, ըստ Akunq.net-ի, հաղորդում է թուրքական «Դողան» լրատվական գործակալությունը:

Աղբյուրի փոխանցմամբ` սույն հայկական միջնադարյան դղյակը 10-րդ և 11-րդ դարերում հայերի կողմից գործածվել է պաշտպանական նպատակներով, սակայն ներկայում ավիրված վիճակում է: Տեղի բնակիչներն անհանգստանում են, թե դղյակը շուտով լիովին կվերանա:

Աղբյուրի փոխանցմամբ` Թուրքիայի քաղաքացիները պահանջում են վերականգնել այն` զբոսաշրջությունը զարգացնելու նպատակով: Այսպես, Անկարայից Ադանա այցելած Իզզեթ Քյոքենը նշել է. «Ամրոցը ողբալի վիճակում է գտնվում: Երեխաներս ցանկացան տեսնել այն, բերեցի, բայց լրիվ քանդված է: Վախենում եմ ներս մտնել: Անհանգստանում եմ, թե երեխաներիս վրա քար կընկնի»:

Ընտանյոք հանդերձ ամրոցը տեսնելու եկած Սյուլեյման Քարաբելենն էլ պահանջել է, որ վերանորոգման աշխատանքները հնարավորինս շուտ սկսեն:

http://www.milliyet.com.tr/tarihi-kaleye-restorasyon-talebi-mersin-yerelhaber-3272574/

Թարգմանեց Մելինե Անումյանը

Akunq.net