Հնարավոր է` վերականգնվի Վանի հայկական Սուրբ Թովմաս վանքը, որը շարունակաբար ենթարկվել է գանձագողերի ավերին

Վանի Գևաշ գավառին ենթակա Ալթընսաչ գյուղի մոտակայքում գտնվող 11-րդ դարում կառուցված Սուրբ Թովմաս հայկական վանքը շարունակում է ենթարկվել գանձագողերի պատճառած ավերին: Այդ մասին, ըստ Akunq.net-ի, հաղորդում են թուրքական լրատվամիջոցները:

Աղբյուրի համաձայն` Գևաշի գավառապետ Մուրաթ Սեզերը նշել է, թե գանձ որոնողների «անխղճության» հետևանքով վանքը մեծ վնաս է կերել և ենթակա է վերականգման:

Մուրաթ Սեզերը շեշտել է, որ զբոսաշրջությունը զարգացնելու նպատակով եկեղեցին հարկ է ըստ արժանվույն ներկայացնել, և որ գավառապետարանը վանքի վերականգման համար դիմել է Թուրքիայի մշակույթի և զբոսաշրջության նախարարությանը:

Նա նաև հայտնել է, որ սույն եկեղեցին մինչ օրս բավարար չափով ուշադրության չի արժանացել պետության կողմից և ավիրված վիճակում է` պահպանման տակ գտնված չլինելու պատճառով:

Գևաշի գավառապետը նաև նշել է, որ տեղական իշխանությունների ցանկությունն ու խնդրանքն է, որ վանքը հնարավորինս արագ վերանորոգվի, որպեսզի օտարերկրյա զբոսաշրջիկները ևս կարողանան հիանալ նրանով:

Հիշեցնենք, որ Արևմտյան Հայաստանի ավերված վանքերն ու եկեղեցիները Թուրքիայի կողմից խիստ հազվադեպ վերանորոգվում են հիմնականում տվյալ շրջաններում ևս զբոսաշրջությունը զարգացնելու նկատառմամբ:

Սկզբնաղբյուր` https://www.memurlar.net/haber/834223/definecilerin-tahrip-ettigi-manastir-ilgi-bekliyor.html

Մելինե Անումյան

Աղբյուր` Akunq.net