Այս բացառիկ լուսանկարն արվել է Սողոմոն Թեհլիրյանի դատավարության նիստերից մեկի ժամանակ՝ 1921 թվականի հունիսի 2-ին կամ 3-ին, Բեռլինում: Հայոց ցեղասպանության թանգարան ինստիտուտը հրապարակել է լուսանկարը՝ ներկայացնելով պատմական ակնարկ.
«1921 թ. մարտի 15-ին Սողոմոն Թեհլիրյանը Բեռլինում գնդակահարեց Օսմանյան կայսրության ներքին գործերի նախկին նախարար Թալեաթին: Վերջինս ծպտյալ Գերմանիա էր տեղափոխվել՝ փոխելով արտաքինը և անձնական տվյալները:
1921 թ. հունիսին Բեռլինում կայացավ Սողոմոն Թեհլիրյանի դատավարությունը, որը տևեց երկու օր: Դատավարության ընթացքում Թալեաթի դեմ վկայություն տվեցին գերմանացի բարձրաստիճան սպա Լիման ֆոն Սանդերսը, հայտնի հասարակական գործիչ Յոհաննես Լեփսիուսը, ցեղասպանությունը վերապրած հայեր: Ս. Թեհլիրյանին պաշտպանում էին Գերմանիայի անվանի իրավաբանները: Դատապաշտպանները Թալեաթի հանցանքը հիմնավորելու համար օգտագործեցին բնօրինակ հեռագրեր, որտեղ Թուրքիայի ներքին գործերի նախկին նախարարը հայերի բնաջնջման և տեղահանության հրամաններ էր տալիս:
Դատավարության ընթացքում բերված փաստերի ու վկայությունների արդյունքում գերմանական դատարանն արդարացրեց Սողոմոն Թեհլիրյանին»:
Leave a Reply