Պոնտոսի յոյներու ցեղասպանութեան 100-ամեակին առնչութեամբ Յունաստանի վարչապետ Ալեքսիս Ցիփրաս պոնտոսցի յոյներու հետ հանդիպումի ընթացքին յայտարարած է, թէ Յունաստանը վրէժխնդրութիւն չի պահանջեր, այլ արդարութիւն: Այս մասին կը հաղորդէ «ՌԻԱ Նովոսթի» լրատու գործակալութիւնը:
«Այն, ինչ որ տեղի ունեցած է 1914 եւ 1923 թուականներուն, յայտնի է բոլոր յոյներուն: Ատիկա խոր վէրք է հելլենիզմի մարմինին վրայ: Հարիւր հազարաւոր քրիստոնեայ յոյներ աքսորուեցան, դժուարութիւններէ վերապրեցան: Անոնցմէ շատեր կազմակերպուած բռնութեան զոհ դարձան: Ատիկա կը հաստատուի պատմական վկայութիւններով եւ գրութիւններով: Ատիկա ցնցող մարդկային ողբերգութիւն է», ըսած է Ցիփրաս:
«Պիտի համարձակիմ ըսել, որ զայն պիտի ճանչնան մեր դրացիները, որովհետեւ պատմութեան ճանաչումը լաւ դաս է ապրելու համար», ըսած է Ցիփրաս:
Յունաստանի վարչապետը յայտնած է, որ մտադիր է յանձնախումբ մը ձեւաւորել: Թեսաղոնիկէի Արիստոտելի անուան համալսարանի հնագիտութեան եւ պատմութեան կաճառին մէջ պիտի հիմնուի պոնտական հետազօտութիւններու ամպիոն:
Յունաստանի մէջ 19 մայիսին կը նշեն պոնտացի յոյներու ցեղասպանութեան յիշատակի օր:
Leave a Reply