Ողբերգություն է, որ աշխարհի շատ երկրներ դեռ չեն ճանաչել Հայոց ցեղասպանությունը. Ավստրիա-Հայաստան պատգամավորական բարեկամության խմբի ղեկավար

Հայաստանում գտնվող Ավստրիայի Ազգային խորհրդի Ավստրիա–Հայաստան պատգամավորական բարեկամության խմբի ղեկավար Գուդրուն Քուգլերի գլխավորած պատվիրակությունը մայիսի 11-ին, ԱԺ Հայաստան–Ավստրիա բարեկամական խմբի ղեկավար Վիկտոր Ենգիբարյանի և Հայոց ցեղասպանության թանգարան–ինստիտուտ հիմնադրամի տնօրեն Հարություն Մարությանի ուղեկցությամբ, այցելել է Հայոց ցեղասպանության հուշահամալիր:

Ինչպես հայտնում են Հայոց ցեղասպանության թանգարան-ինստիտուտից, հյուրերը ծաղիկներ են դրել անմար կրակի մոտ, հարգել Հայոց ցեղասպանության Սուրբ նահատակների հիշատակը: Այնուհետև, ավստրիացի խորհրդարանականները եղել են Հայոց ցեղասպանության թանգարանում, ծանոթացել ցուցանմուշներին, գրառում կատարել Պատվավոր հյուրերի հուշամատյանում:

Ընդգծելով, որ Ավստրիան Հայոց ցեղասպանությունը ճանաչել է 2015 թ.՝ Գուդրուն Քուգլերը նշել է. «Ողբերգություն է, որ աշխարհի շատ երկրներ դեռեւս չեն ճանաչել Հայոց ցեղասպանությունը, պետք է պայքարենք ճանաչման ուղղությամբ: Աննկարագրելի է, թե ինչ է կատարվել հայ ազգի հետ»:

https://www.tert.am/am/news/2019/05/11/austria-genocide/2996581