Քրդամետ կուսակցության հայտարարությունը Ստամբուլի ընտրությունների չեղարկման մասին

Թուրքիայի կենտրոնական ընտրական հանձնաժողովի (ԿԸՀ) կողմից Ստամբուլի քաղաքապետի ընտրությունը չեղարկելու և նոր ընտրություններ նշանակելու որոշումը մեծ արձագանք է առաջացրել Թուրքիայում:  

Թեմայի վերաբերյալ ընդդիմադիր ճամբարից հայտարարություն է արել քրդամետ Ժողովուրդների դեմոկրատական կուսակցությունը (HDP-ԺԴԿ):

ԺԴԿ-ի տարածած հայտարարության մեջ մասնավորապես ասվում է.

«Կենտրոնական ընտրական հանձնաժողովը, օրենքը ոտնատակ տալով, ինքն իրեն հերքելով և իշխանությունների առաջ գլուխ խոնարհելով, մի որոշում է կայացրել, որը բացարձակ անօրինական է: Դատավորները ևս մեկ անգամ հագել են իրենց թիկնոցները և անտեսել բարոյական ու իրավական արժեքները»:

Հիշեցնենք, որ մարտի 31-ին Թուրքիայում կայացած ՏԻՄ ընտրություններում երկրի խոշոր քաղաքներում, այդ թվում՝ Ստամբուլում հաղթել էր ընդդիմադիր Ժողովրդահանրապետական կուսակցությունը (ԺՀԿ-CHP)։

Ստամբուլում պարտված Արդարություն և զարգացում կուսակցությունը (AKP-ԱԶԿ) քաղաքի տարբեր շրջանների արդյունքները բողոքարկելուց հետո ԿԸՀ էր ներկայացրել քաղաքապետի ընտրությունը չեղարկելու և նոր ընտրություն անցկացվելու պահանջով դիմումը: Ինչից օրեր անց ԿԸՀ-ը որոշում կայացրեց չեղարկել ընտրությունները՝ չեղյալ հայտարարելով 16.000 ձայնի առավելությամբ քաղաքապետ ընտրված ընդդիմադիր ԺՀԿ-ի թեկնածու Էքրեմ Իմամօղլուի մանդատը:

Թուրքիայի խոշորագույն քաղաքի քաղաքապետի նոր ընտրությունների օր է նաշանակվել հունիսի 23-ը:

Աղբյուր` Demokrathaber.org

Ermenihaber.am