Դիարբեքիրում կազմակերպված թատերական փառատոնի շրջանակներում ցուցադրվել է նաև Զապել Եսայանի կյանքին նվիրված բեմադրություն

Դիարբեքիրի թատերական փառատոնի շրջանակներում Բողազիչիի կատարողական արվեստի միության դերասանների կողմից բեմադրվել է նաև հայ գրող Զապել Եսայանի  մասին պատմող «Զապել» խորագրով ներկայացումը։ Այդ մասին փոխանցում է Akunq.net-ը` հիմնվելով «Մեզոպոտամիա» լրատվական գործակալության հաղորդած տեղեկության վրա:

Աղբյուրի համաձայն` «Ճշմարտությունը ազատություն է բերում» կարգախոսով կազմակերպված Ամեդի (Դիարբեքիր / Տիգրանակերտ-Ակունքի խմբ.) թատերական 7-րդ փառատոնի շրջանակներում հայ արձակագիր Զապել Եսայանի մասին պատմող «Զապել» ներկայացումը ցուցադրվել է Դիարբեքիրի կոնգրեսի ու մշակույթի կենտրոնին պատկանող «Չանդ Ամեդ» թատրոնի դահլիճում։ Բողազիչիի կատարողական արվեստի միության դերասանների կողմից բեմադրված ներկայացումը պատրաստվել է Եսայանի «Սիլիհտարի պարտեզները» գրքի հիման  վրա։

1878 թ. Սկյուտարում ծնված հայ մտավորական Եսայանի կյանքը ներկայացնող բեմադրության մեջ ներկայացվում է, թե ինչպես է 1915 թ. ապրիլի 24-ին ձերբակալված մտավորականների շարքում եղած Եսայանին հաջողվել փախչել Կ.Պոլսից։

Եսայանի դերակատարներն են Դույգու Դալյանօղլուն ու ներկայացման սցենարի հեղինակ Այսել Յըլդըրմը։ Այս թատերական ներկայացման մյուս դերակատարներն են Բյուշրա Քարփուզը, Էլիֆ Քարամանը, Մարալ Չանքայան, Միրայ Բալն ու Նիհալ Ալբայրաքը, որոնք մարմնավորում են տարբեր ժամանակահատվածներում Եսայանի կյանք մտած մարդկանց։

2 գործողությունից բաղկացած ներկայացման ավարտից հետո հանդիսատեսը երկար ժամանակ ծափահարեց դերասաններին։ Ավելի ուշ արվեստագետ Ռուգեշ Քըրըջըն նվերներ հանձնեց նրանց։

Ամեդի թատերական փառատոնը Դիարբեքիրի կոնգրեսի ու մշակույթի կենտրոնի «Չանդ Ամեդ» դահլիճում կշարունակվի մինչև մայիսի 5-ը։

Թատերական ներկայացման սյուժեն

Զապել Եսայանը, տարիներ շարունակ աքսորականի կյանքով ապրելուց հետո, 55 տարեկան  հասակում որոշում է տեղափոխվել Խորհրդային Հայաստան, որը նա կոչում էր «Իմ նոր հայրենիք»։ Սակայն 1937 թ. Ստալինի կողմից կազմակերպված «Մեծ մաքրություն» գործողության ժամանակ նա ձերբակալվում է։

Ներկայացումը սկսվում է մի ցուրտ ու մութ բանտախցի տեսարանով։ Բեմադրության առաջին հատվածում ցուցադրվում են հարցաքննության տեսարանները, որոնցում Զապելին ստիպում են խոստովանել մի մեղք, որը նա իրականում չի գործել։  Ներկայացման մեջ առկա են նաև անցյալին պատկանող տեսարաններ, որոնք նա հիշում է բանտախցի մթությունից ու հարցաքննության ճնշող զգացողություններից փախչելու համար։ Դրանք ձևավորում են «Հիշողություն» գործողությունը։ Եսայանը հիշում է  իր ծնունդը, մանկությունը, երիտասարդությունը, թե ինչպես է որոշում գրող դառնալ, հիշում է Ադանայի կոտորածները, 1915 թ. փախուստը Ստամբուլից։ Այս հիշողությունները Զապելին ուժ են տալիս և նա  դիմակայում է քննիչին։

http://mezopotamyaajansi14.com/KULTUR-SANAT/content/view/56153

Թարգմանեց Անի Մելքոնյանը

Akunq.net