Սաֆրաստյան․«Թուրքիայի հայ համայնքը հիմնականում իր ձայնը կտա Էրդողանի կուսակցությանը»

Էրդողանի կուսակցությունը կպահպանի առաջատարի դիրքը։ Թուրքիայում սպասվող ՏԻՄ ընտրությունների մասին խոսելով՝ Sputnik Արմենիայի եթերում նման կարծիք հայտնեց Հայաստանի ԳԱԱ Արևելագիտության ինստիտուտի տնօրեն Ռուբեն Սաֆրաստյանը։

Նրա խոսքով` անակնկալների սպասել պետք չէ։

«Իսկ Ստամբուլում` Թուրքիայի խոշորագույն քաղաքում, ամենայն հավանականությամբ, կհաղթի Թուրքիայի նախկին վարչապետ և խորհրդարանի փոխխոսնակ Բինալի Յըլդըրըմը։  Ավելի կոշտ պայքար կծավալվի մայրաքաղաք Անկարայում։ Այստեղ կմրցեն իշխող կոալիցիայի անդամ ԱԶԿ–ն, Ազգայնական շարժում պանթուրքական կուսակցությունը և Ժողովրդահանրապետական կուսակցությունը»,-ասաց Սաֆրաստյանը։

Ինչ վերաբերում է հայկական համայնքին, Սաֆրաստյանի խոսքով, Թուրքիայի հայ համայնքը հիմնականում իր ձայնը կտա Էրդողանի և քեմալական Ժողովրդահանրապետական կուսակցությանը։ Թեև, ըստ արևելագետի, պետք է հաշվի առնել, որ Էրդողանի կոալիցիոն գործընկեր պանթուրքիստների առկայությունը ինչ–որ չափով վախեցնում է հայ ընտրողներին և նրանք կարող են քվեարկել քեմալականների օգտին։

Սաֆրաստյանի բնորոշմամբ, ՏԻՄ ընտրությունները, մեծ հաշվով, կլինեն աշնանը կայանալիք խորհրդարանական ընտրությունների նախերգանքը:
https://armeniasputnik.am/radio/20190313/17681532/turkiayi-hay-hamaynqy-himnakanum-ir-dzayny-kta-erdoxani-kuskacutyany.html