Թաղապետի թեկնածուն խոսել է Ստամբուլի պատմության մեջ հայերի ունեցած դերի մասին

Թուրքիայում իշխող Արդարություն և զարգացում (ԱԶԿ-AKP) կուսակցության անդամ, Ստամբուլի Ֆաթիհ վարչական շրջանի թաղապետի թեկնածու առաջադրված Էրգյուն Թուրանը նախընտրական քարոզարշավի շրջանակներում հանդիպել է Ստամբուլի Սամաթիա թաղամասում գտնվող Սուրբ Գևորգ հայկական եկեղեցու հիմնադրամի ղեկավարների հետ։

Ինչպես հայտնի է, մարտի 31-ին Թուրքիայում անցկացվելու են ՏԻՄ ընտրություններ։

Հանդիպման ընթացքում Թուրանը խոսել է Ստամբուլի պատմության մեջ հայերի ունեցած դերի մասին:

«Մեր հայ հայրենակիցները Ստամբուլի հիմնական սյուներից են։ Հնարավոր է, որ եղել են խնդիրներ, սակայն դրանք ժամանակավոր բնույթ են կրել։ 1453-ից ի վեր հայ վարպետները շատ մեծ ներդրում են ունեցել քաղաքի շինարարության մեջ»,- ասել է Էրգյուն Թուրանը:

Հիմնադրամի ղեկավերների հետ հանդիպումից հետո Թուրանն այցելել է Ստամբուլի հայկական Նունյան վարժարան և խոստացել ընտրություններից հետո վարժարանում ներդնել գերժամանակակից էլեկտրոնային գրատախտակներ։

Աղբյուր` Mynet

Ermenihaber.am