Պաշտօնական այցելութեամբ Երեւան ժամանած Կիպրոսի Հանրապետութեան պաշտպանութեան նախարար Սաւաս Անկելիտիսի գլխաւորած պատուիրակութիւնը 13 փետրուարի առաւօտեան այցելեց Հայոց Ցեղասպանութեան յուշահամալիրը եւ թանգարանը:
Թանգարանի լրատուական ծառայութիւնը կը տեղեկացնէ, թէ Կիպրոսի պաշտպանութեան նախարարը յարգանքի տուրք մատուցեց զոհերու յիշատակին, այցելեց Հայոց Ցեղասպանութեան թանգարանը, ծանօթացաւ ցուցադրութեան եւ գրառում կատարեց Պատուաւոր հիւրերու յուշամատեանին մէջ:
ՀՑԹԻ հիմնարկի տնօրէն Յարութիւն Մարութեան բարձրաստիճան հիւրին յանձնեց Մխիթարեան միաբանութեան միաբան Վահան Ծ. վրդ. Օհանեանի եւ աւստրալահայ Արա Քեթիպեանի կազմած 1890-1922 ամերիկեան մամուլին մէջ հրատարակուած Հայոց Ցեղասպանութեան վերաբերող յօդուածներու երկու հատորը:
Նշենք, որ Կիպրոսի պաշտպանութեան նախարարը հանդիպեցաւ վարչապետ Նիկոլ Փաշինեանի հետ: Հանդիպման ընթացքին քննարկուեցան պաշտպանութեան ոլորտին մէջ Հայաստանի եւ Կիպրոսի համագործակցութիւնը խորացնելուն վերաբերող հարցեր:
Asbarez.com
Leave a Reply