Չորեքշաբթի, 6 փետրուար 2019-ին, Արամ Ա. կաթողիկոս շնորհակալական ու գնահատանքի նամակ մը յղեց Ֆրանսայի Հանրապետութեան նախագահ Էմանուէլ Մաքրոնին` ջերմօրէն ողջունելով Ապրիլ 24-ը Ֆրանսայի մէջ «Հայոց ցեղասպանութեան յիշատակի ազգային օր» հռչակելու իր որոշումը:
Վեհափառ հայրապետը իր նամակին մէջ ընդգծելով նախագահ Մաքրոնի սոյն որոշումին յատուկ կարեւորութիւնը` կ՛ըսէ. «Մենք խորապէս կը հաւատանք, թէ այս որոշումը պերճախօս արտայայտութիւնն է ձեր ունեցած ամուր կապուածութեան, արդարութեան, մարդկային իրաւանց, պատմական անհերքելի իրողութեան եւ 20-րդ դարու առաջին Ցեղասպանութեան ճանաչման անհրաժեշտութեան»:
Վեհափառ հայրապետը իր նամակը կ՛եզրակացնէ յայտնելով, թէ նախագահին այս որոշումը շօշափելի արտայայտութիւնն է այն բարեկամական կապերուն, որոնք կը միացնեն ֆրանսացի եւ հայ ժողովուրդները:
Leave a Reply