Նիդերլանդներում հայկական կազմակերպությունների ֆեդերացիան Հրանտ Դինքին նվիրված հիշատակի երեկո է կազմակերպել

Հրանտ Դինքի սպանության 12-րդ տարելիցի նախօրյակին` hունվարի 18-ին, Նիդերլանդներում հայկական կազմակերպությունների ֆեդերացիան, Ուսումնասիրությունների և կրթության միջազգային ինստիտուտի հետ համագործակցությամբ, կազմակերպել էր հիշատակի միջոցառում, որին մասնակցում էին Հրանտ Դինքի ընկերները, ինչպես նաև հոլանդահայ համայնքի մի շարք ներկայացուցիչներ:

Ինչպես «Արմենպրես»-ը տեղեկացավ Նիդերլանդներում Հայաստանի դեսպանության «Ֆեյսբուք»-ի էջից, միջոցառմանը որպես բանախոսներ հրավիրված էին Հրանտ Դինքի ընկեր, «Ակօս» թերթի նախկին խմբագիր Արիս Նալջին և Հաագայի խաղաղության ծրագրերի համակարգող, Հայ-թուրք-քրդական աշխատանքային խնբի ղեկավար Թայֆուն Բալչըքը, ովքեր պատասխանել են ներկաների բազմաթիվ հարցերին:

Երեկոյի ընթացքում ներկաները հնարավորություն ունեցան դիտելու Ռաքել Դինքի տեսաուղերձը:

Միջոցառմանը մասնակցել է նաև Նիդերլանդների Թագավորությունում Հայաստանի Հանրապետության հյուպատոս Քրիստինե Ստեփանյանը։

https://armenpress.am/arm/news/961401/