Թուրքիան տնտեսապէս քանդել սպառնալէն մէկ օր ետք. «Ամերիկայի եւ Թուրքիոյ միջեւ տնտեսական բարգաւաճման ծիրը մեծապէս ընդլայնելու կարելիութիւններ ունի» կ՛ըսէ Թրամփ

Միացեալ Նահանգներու նախագահ Տանըլտ Թրամփ յայտնեց, որ Միացեալ Նահանգներու եւ Թուրքիոյ միջեւ տնտեսական զարգացման ոլորտի ընդլայնումի մեծ կարելիութիւն կը տեսնէ:

Թրամփ ըսաւ, թէ Թուրքիոյ նախագահ Ռեճեփ Թայիփ Էրտողանի հետ հեռաձայնային հաղորդակցութեան մը ընթացքին քննարկած է վերջին երկու շաբթուան ընթացքին ՏԱՀԵՇ-ի մնացորդին դէմ պայքարին մէջ արձանագրուած յաջողութիւնները, ինչպէս նաեւ Սուրիոյ մէջ 20 մղոն տարածութեամբ անվտանգութեան գօտիի ստեղծման հարցը:

Միացեալ Նահանգներու նախագահը վերահաստատեց, որ Ուաշինկթըն կը կանգնի իր կողքին կռուած քիւրտերուն կողքին:

Թուրքիոյ նախագահութիւնը իր կարգին հաղորդեց, որ երկու նախագահները հեռաձայնային հաղորդակցութեան մը ընթացքին քննարկած են հիւսիսային Սուրիոյ մէջ անվտանգութեան գօտի ստեղծելու հարցը` աւելցնելով, որ անոնք շեշտած են Մընպեժի վերաբերեալ ճամբու քարտէսը ամբողջացնելու եւ «ամերիկեան ուժերու հեռացումը խանգարել փափաքող տարրերուն առիթ չընծայելու» կարեւորութիւնը:

Էրտողան ողջունած է ամերիկեան ուժերը Սուրիայէն հեռացնելու Թրամփի որոշումը եւ յայտնած, որ Թուրքիան պատրաստակամ է Միացեալ Նահանգներուն «ամէն տեսակի աջակցութիւն» տրամադրելու:

Էրտողան իր կարգին երէկ յայտնեց. «Վստահ եմ, որ երէկ հեռաձայնային հաղորդակցութեան ընթացքին Թրամփի հետ պատմական փոխհասկացողութիւն գոյացուցի»: Ան նշեց, որ կ՛ողջունէ Սուրիոյ շուրջ Թրամփի որոշումը, սակայն ատիկա տակաւին գետնի վրայ իր արձագանգը չէ ունեցած:

Էրտողան յայտարարեց, թէ Անգարան պիտի ստանձնէ Միացեալ Նահանգներու նախագահին ակնարկած Թուրքիոյ սահմանն ու քրտական Ժողովուրդի պաշտպանութեան ջոկատները իրարմէ անջատելու աւելի քան 30 քիլոմեթր խորութեամբ անվտանգութեան գօտիի ստեղծումը:

Միացեալ Նահանգներու նախագահի ազգային անվտանգութեան հարցերու խորհրդատու Ճոն Պոլթըն իր կարգին յայտնեց, որ Թրամփ Էրտողանի հետ հաղորդակցութեան ընթացքին շեշտած է «մեր կողքին կռուած քիւրտերուն կողքին կանգնելու հաստատ կեցուածքը»:

Միւս կողմէ, Թուրքիոյ իշխող Արդարութիւն եւ բարգաւաճում կուսակցութեան փոխնախագահ Նուման Քուրթուլմուշ յայտնեց, որ Թուրքիան տնտեսապէս քանդելու Թրամփի սպառնական խօսքը անմիջապէս սրբագրելը շատ կարեւոր պիտի ըլլայ երկու երկիրներու յարաբերութիւններուն համար: Ան նշեց, որ այդ յայտարարութիւնը «հիւանդագին» է եւ «տգիտութիւն ու անփութութիւն կը բուրէ»:

http://www.aztagdaily.com/archives/423479