Ալեքսանդրետի (թուրք. անվանումը` Իսքենդերուն) հայերը 2019 թ. հունվարի 5-ի երեկոյան տեղի Քառասուն մանկանց հայկական եկեղեցում մասնակցել են Սուրբ ծննդյան նախօրեին կատարվող Ճրագալույցի պատարագին, որը մատուցվել է եկեղեցու հոգևոր հովիվ Ավետիս Թաբաշյանի ձեռամբ: Այդ մասին, ըստ Akunq.net-ի, հաղորդում են թուրքական լրատվամիջոցները:
Աղբյուրի փոխանցմամբ` հոգևորական Թաբաշյանն արարողության ընթացքում խոսել է սույն տոնի նշանակության մասին` մասնավորապես նշելով.
«Հիսուս Քրիստոսը մեզ սեր է տվել: Աստված օրհնում է սիրով արված ամեն բան: Ձեր կյանքում պահպանեք սերը, այդ դեպքում մնացած ամեն ինչ դյուրին կերպով կտրվի ձեզ: Թող աստվածային սերն ավելանա ձեր հոգիներում»:
Պատարագից հետո կատարվել է նաև ջրօրհնեքի արարողություն: Քրիստոսի ծնունդն ավետող շարականների ուղեկցությամբ օրհնված աղը, հացն ու ջուրը բաժանվել է տեղի հայերին:
Ինչպես ամեն տարի, այս անգամ ևս տոնական միջոցառումների շրջանակներում հայտնվել է Ձմեռ պապը և նվերներ բաժանել ներկա գտնվող մանուկներին:
Թարգմանեց Մելինե Անումյանը
Akunq.net
Leave a Reply