Դիարբեքիրի հայերն այս անգամ էլ չեն կարողանա Սուրբ ծնունդը հայկական եկեղեցում նշել

Դիարբեքիրի հայերն այս անգամ էլ չեն կարողանա սուրբծննդյան տոնակատարությունն իրականացնել Սուրբ Կիրակոս եկեղեցում: Այդ մասին, ըստ Akunq.net-ի, հայտնում է Կ.Պոլսում հրատարակվող «Ակօս» շաբաթաթերթը:

Պարբերականը հիշեցնում է, որ դեկտեմբերի 25-ին համայն աշխարհի, ինչպես նաև Թուրքիայի կաթոլիկ, բողոքական և ուղղափառ քրիստոնյաները նշում են Հիսուս Քրիստոսի Ծնունդը, իսկ Հայ առաքելական եկեղեցին այն կտոնի հունվարի 6-ին։

Կաթոլիկ աշխարհի հոգևոր առաջնորդ Ֆրանցիսկոս Պապը, սուրբծննդյան գիշերը պատարագ մատուցելով Սուրբ Պետրոսի տաճարում, հանդես եկավ նաև ուղերձով։

Ծիսակատարության ժամանակ Վատիկանում անվտանգության խիստ միջոցառումներ էին ձեռնարկվել, քանի որ անցած շաբաթ Իտալիայի հարավային հատվածում մի մարդ էր ձերբակալվել` «Իսլամական պետության» անդամ լինելու մեջ կասկածանքով։

Հռոմի պապ Ֆրանցիսկոսն այդ քարոզի ընթացքում քննադատեց նյութական կյանքից կախվածությունն ու ագահությունը։ Նա ասաց, որ մանուկ Հիսուսի չքավորությունը պետք է ագահ մարդկանց հիշեցնի կյանքի իրական իմաստի մասին։

Նա դեկտեմբերի 25-ին՝ երեքշաբթի օրը, Սուրբ Պետրոսի հրապարակում «Քաղաքին ու աշխարհին» խորագրով ելույթի ժամանակ դիմեց հազարավոր մարդկանց։ Հռոմի պապն ուշադրություն հրավիրեց գաղթականների հետ կապված խնդիրների վրա և ցանակացավ, որ այդ տարբերություններն ընդունվեն ոչ թե որպես սպառնալիք, այլ` հարստության աղբյուր։ Հռոմի պապն առաջարկեց, որ նորից սկսվեն բանակցությունները Իսրայելի ու Պաղեստինի միջև և մաղթեց, որ Սիրիայի ու Եմենի հարցը ևս լուծում ստանա։

Թուրքիայում նույնպես, հատկապես Ստամբուլում (Կոստանդնուպոլիս-Ակունքի խմբ.), Հաթայում (Ալեքսանդրետ-Ակունքի խմբ.), Իզմիրում (Զմուռնիա-Ակունքի խմբ.), Մերսինում եկեղեցի այցելած քրիստոնյաները Սուրբ ծնունդը նշեցին աղոթքներով ու ժամերգություններով։

Ստամբուլում տոնակատարությունների կենտրոնը, ինչպես ամեն տարի, այս տարի ևս Թաքսիմում գտնվող Սուրբ Անտուան կաթոլիկ եկեղեցին էր։

Հաթայում Սուրբ Ծննդի կապակցությամբ Անթաքիայի ու Իսքենդերունի ուղղափառ եկեղեցիներում պատարագ մատուցվեց։

Անթաքիայի (Անտիոք-Ակունքի խմբ.) Ուղղափառ եկեղեցու համայնքի հիմնադրամի ղեկավար Ֆադի Հուրիգիլը լրագրողներին տեղեկացրեց, որ պատարագին մասնակցել են բոլոր կրոնների հետևորդ` Թուրքիայի բազմաթիվ քաղաքացիներ։ Նա նշեց նաև, որ պատարագի ժամանակ աղոթել են աշխարհի խաղաղության համար, ապա հավելեց. «Դիմավորեցինք Հիսուս Քրիստոսի ծնունդը։ Այդ երջանիկ օրը մեր եկեղեցին լեփ-լեցուն էր։ Եկեղեցի էին եկել ոչ միայն Անթաքիայից, այլև՝ Թուրքիայի բոլոր վայրերից. ներկա էին բոլոր հավատքների հետևորդները։ Մաղթում եմ, որ Սուրբ ծնունդն ու մոտալուտ Նոր տարին հաջողություն բերեն նախ մեր երկրին, ապա` համայն աշխարհին ու մարդկությանը»։

Անթաքիայի ուղղափառ եկեղեցում տեղի ունեցած պատարագը մատուցեցին եկեղեցու հոգևոր առաջնորդ Ժան Դելյուլլերն ու քահանա Դիմիտրի Դողումը։

Իզմիրի Սելչուք գավառում գտնվող Սուրբ Մարիամ Աստվածածնի տանը Սուրբ Ծննդյան առթիվ պատարագ մատուցվեց։

Մերսինի Լատին կաթոլիկ եկեղեցում և ուղղափառ եկեղեցում կատարված պատարագի մասնակիցները մոմ վառեցին ու աղոթք արեցին։

Դիարբեքիրում ասորիներն ու քաղդեացիները սուրբծննդյան տոնակատարությունն այս տարի ևս նշել են Սուրիչի թաղամասում գտնվող և 1700-ամյա  պատմություն ունեցող Սուրբ Մարիամ Աստվածածին եկեղեցում։ Այս եկեղեցու քահանա Յուսուֆ Աքբուլութի ղեկավարությամբ մատուցված պատարագը տևեց 2.5 ժամ։ «Արթը գերչեք» լրատվականին հարցազրույց տված Յուսուֆ Աքբուլութը հիշեցրել է, որ այդ օրը Հիսուս Քրիստոսի ծնունդն է և մաղթանք հղել. «Այո՛, ցավոք սրտի, Մերձավոր Արևելքում պատերազմ է։ Ամեն օր մարդիկ են մահանում։  Աղոթում ենք։ Ցանկանում ենք, որ այլևս պատերազմ չլինի, և տիրեն խաղաղությունն ու եղբայրությունը։ Մաղթում եմ, որ այս օրը խթանի խաղաղության ու եղբայրության տարածմանը»։

Պատարագին մասնակցեցին նաև քաղաքում ապրող հայերը։ Դիարբեքիրում գտնվող Սուրբ Կիրակոս եկեղեցու ու շրջակայքի ելումուտը շարունակում է փակ մնալ նահանգապետարանի կողմից։ Դիարբեքիրցի հայերը մի հունվարի 6 ևս  կանցկացնեն առանց իրենց եկեղեցիներում մատուցվող պատարագի։

Իսկ Ստամբուլի Զողրաֆյոն լիցեյի աշակերտներն ու ծնողները երգեր երգեցին Բեյօղլու թաղամասի փողոցներում և ամանորյա թխվածք բաժանեցին անցորդներին։

http://www.agos.com.tr/tr/yazi/21779/hiristiyan-dunyasi-noel-i-kutluyor

Թարգմանեց Անի Մելքոնյանը

Akunq.net