Թուրքիայում ահաբեկչության դեմ պայքարի մասին օրենքների պատճառով որոշ մարդկանց` այդ երկրում ապրելն անհնարին է դարձել: Նման հայատարություն է արել Եվրոպայի խորհրդի մարդու իրավունքների հարցերով հանձնակատար Դունյա Միյատովիչը՝ գերմանական DW հեռուստառադիոընկերության թուրքական ծառայությանը տված հարցազրույցում:
«Թուրքիայում ահաբեկչության դեմ պայքարի մասին օրենքներն ուղղակի անհնարին են դարձնում որոշ մարդկանց ապրելն այդ երկրում», – ասել է Միյատովիչը՝ շեշտելով, որ ահաբեկչության դեմ պայքարը յուրաքանչյուր կառավարության օրինական իրավունքն է, սակայն դա չպետք է իրականացվի մարդկանց իրավունքների ոտնահարման ու ազատությունների սահմանափակման հաշվին:
«Եվրոպայում ահաբեկչության դեմ պայքարի մասին օրենքների չարաշահման ազդեցությունը խոսքի ազատության վրա» զեկույցի հեղինակ Միյատովիչը հարցազրույցում անդրադարձել է զեկույցի՝ Թուրքիային վերաբերող մասին ու հավելել, որ մտադիր է թեման քննարկել թուրքական իշխանությունների հետ:
Միյատովիչը կոչ է արել Թուրքիայի իշխանություններին ի կատար ածել Մարդու իրավունքների եվրոպական դատարանի վճիռը՝ ազատ արձակելով քրդամետ Ժողովրդադեմոկրատական կուսակցության նախկին համանախագահ Սելահաթթին Դեմիրթաշին, որին թուրքական իշխանությունները մեղադրում են ահաբեկչական խմբավորման հետ կապի համար:
Եվրոպացի պաշտոնյան խոսել է նաև թուրք հասարակական գործիչ, վերլուծաբան ու գործարար Օսման Քավալայի կալանքի մասին՝ ընդգծելով, որ մեկ տարվա կալանքից հետո նրան դեռ չի ներկայացվել հստակ մեղադրանք:
«Նա հայտնի բարեգործ ու ակտիվիստ է: Մարդիկ չպետք է առանց մեղադրանքի ազատազրկվեն: Ես սա չեմ ընկալում որպես անկախ դատարանի որոշում: Սա ավելի շուտ հիշեցնում է քաղաքական բռնաճնշում Թուրքիայի քաղաքացիական հասարակության կարևոր անդամի նկատմամբ», – ասել է Միյատովիչը:
Leave a Reply