Ինչպես է խմելու ջուրը «կիպրական մոդելով» հասցվում Աղթամար

Հայկ Գաբրիելյան

2018թ․ նոյեմբերի սկզբին խողովակաշարով խմելու ջուր հասցվեց Վանա լճի Աղթամար կղզի, որի հիմնական խնդիրը մինչ այդ հինգ տասնամյակ հենց խմելու ջրի բացակայությունն էր։ Այդ մասին հայտնել է Վանի նահանգապետ Մուրաթ Զորլուօղլուն: Ստորջրյա խողովակաշարի երկարությունը կազմում է 4 կմ, իսկ ընդհանուր երկարությունը՝ 33 կմ։ Այն կղզի է հասցրել Արտոս լեռան փեշերին գտնվող սառնորակ աղբյուրների ջուրը: Կղզում 5 ցայտաղբյուր է տեղադրվել: Նախագիծն արժեցել է 5 մլն լիրա։ Շինարարական աշխատանքները մեկնարկել էին մայիսի 25-ին։ Ընդ որում՝ Աղթամար ջուրը հասցվել է «կիպրական մոդելով» (ավելի վաղ ներկայացրել ենք Թուրքիայի կողմից Կիպրոս կղզի խմելու ջուր հասցնելը)։

Ընդգծվել է, որ վերջին 10 տարում Աղթամար կղզու բնությունը չորանում էր, և եթե միջոցներ չձեռնարկվեին, Աղթամար կղզին կարող էր անապատանալ: Խողովակաշարի անցկացման ժամանակ հաշվի է առնվել կղզու կարևորությունը Թուրքիայի զբոսաշրջության զարգացման գործընթացում։ Մասնավորապես, նախորդ տարի Աղթամար կղզի այցելել է 120,000 մարդ (ամսական կտրվածքով՝ 10,000 մարդ):

Ակնկալվում է, որ այս տարի այդ ցուցանիշը կհասնի 150.000-ի։ Ջրային այս նախագիծն օգտակար է լինելու ոչ միայն Աղթամար կղզու, այլև՝ ափամերձ գոտու համար։

Haykgabrielyan1981.wordpress.com