Թուրքական «Յենի Մեսաժ» պարբերականի սյունակագիրներից Յուսուֆ Քարաջան հայտնել է, որ երկրում ապաստանած սիրիացի ներգաղթյալները լուրջ վտանգ են ներկայացնում անվտանգության տեսանկյունից, և նրանց շարքերում կարող են լինել անգամ «հայ լրտեսներ»:
«Գիտե՞ք, որ Սիրիայից եկած ուղիղ 20 հազար հայ Թուրքիայի տարածքով մեկնել է Երևան: Լավ, այս հայերը որտեղի՞ց ի հայտ եկան: 1915-ի հայերն են: Այն ժամանակ Սիրիայում էին հաստատվել, իսկ այժմ՝ մեկ դար անց, ինչ-որ մի ձեռք նրանց Սիրիայից Թուրքիա է տեղափոխում: Ոչ Բուլղարիայից, ոչ էլ Աֆղանստանից եկած փախստականների հարցում կասկածներ չեմ ունեցել: Սակայն սիրիացիների հարցում շատ մեծ վախ ունեմ», – պնդել է սյունակագիրը:
«Սա արտաքին ուժերի հետ գաղտնի համաձայնություն է, թե բանավոր պայմանավորվածություն՝ չգիտեմ», – շարունակել է սյունակագիրը:
Նա հիշեցրել է, որ Թուրքիայի նախագահ Ռեջեփ Թայիփ Էրդողանը դեռևս 1989 թվականին, երբ շարքային քաղաքական գործիչ էր, դեմ էր արտահայտվել Բուլղարիայից թուրք փախստականների զանգվածային ներգաղթին՝ նշելով, որ նրանց մեջ կարող են բազմաթիվ լրտեսներ լինել: Ըստ Քարաջայի՝ այժմ իշխանությունները նույնպես պարտավոր են նման զգուշություն ցուցաբերել և «չվերածեն երկիրը քարվանսարայի»:
Իր հոդվածն «ԱՄՆ-ի հայկական խաղը Թուրքիայի դեմ» վերնագրած Քարաջան նաև պնդել է, թե Սիրիայի հյուսիսում կռվող քրդական զինված ջոկատները նույնպես կազմված են ծպտյալ հայերից և, ստանալով ԱՄՆ-ի աջակցությունը, պայքարում են Թուրքիայի դեմ:
Leave a Reply