Թուրքիայում հնարավոր է` վերանորոգեն հայկական Խորենյան դպրոցի շենքը` այն հյուրանոց դարձնելու նպատակով

Կոստանդնուպոլսում 1821 թ. բացված հայկական պատմական Խորենյան տարրական դպրոցի շենքը վերածվել է անտուն մարդկանց հավաքատեղիի: Այդ մասին, ըստ Akunq.net-ի, ահազանգում է «Վաթան» պարբերականի հեղինակներից Մերթ Ինանը:

Աղբյուրի համաձայն` Սուրբ Հրեշտակապետ հայկական եկեղեցու կողքին գտնվող սույն քարե կառույցը, արդեն քառորդ դար է, ինչ ավերակ վիճակում` փորձում է կանգուն մնալ: Այս պատմական շինության պատերին ճաքեր են հայտնվել, իսկ ներսը` աղբանոցի վերածվել: Սակայն եթե այն վերանորոգելու նախագիծը հավանության արժանանա, ապա կառույցը կվերածվի հյուրանոցի:

Ստամբուլի Բալաթ հրեական թաղամասում գտնվող Սուրբ Հրեշտակապետ հայկական եկեղեցու Խորենյան դպրոցի և գերեզմանոցի հիմնադրամի երկրորդ նախագահ Արամ Քուրանը լրատվամիջոցին հայտնել է, որ իրենք շինությունը վարձել են 18 տարի ժամկետով, և եթե թույլտվություն ստանան ու այն հյուրանոցի վերածեն, ապա հավելյալ եկամուտ կապահովեն իրենց հիմնադրամի համար:

https://www.turizmajansi.com/haber/restorasyona-onay-cikarsa-otel-olacak-h28301

Թարգմանեց Մելինե Անումյանը

Akunq.net