Թուրքիայի պաշտպանության նախարարն սպառնացել է քրդերին. «Ձեզ թաղելու ենք ձեր իսկ փորած խրամատներում»

Թուրքիայի պաշտպանության նախարար Հուլուսի Աքարը խոսել է Սիրիայի տարածքում` Եփրատ գետի արևելյան հատվածում, տեղի քրդական ուժերի դեմ սպասվող ռազմական գործողության մասին։

Օրեր առաջ մի շարք թուրք բարձրաստիճան պաշտոնյաներ, այդ թվում Թուրքիայի նախագահը, հայտարարեցին, որ երկրի զինված ուժերը ռազմական գործողություն են սկսելու քրդերի դեմ։

Աքարը, հաստատելով քրդերի դեմ նոր ռազմական գործողություններ սկսելու մտադրությունը, ասել է.

«Սիրիայի Աֆրին քաղաքում մենք սպանեցինք 4500-ից ավելի քուրդ զինյալներ։ Չնայած որ Սիրիայի քրդերին Մանբիչից դուրս բերելու մասին խոստումներ տրվեցին, այնուամենայնիվ դրանք չիրականացան, և ահաբեկչական կազմակերպությունը, ինչպես Աֆրինում, այնպես էլ Մանբիչում խրամատներ փորեց և ամրապնդվեց։ Ահաբեկիչները (քուրդ զինյալներ) պետք է իմանան, որ իրենց թաղելու ենք իրենց իսկ թաղած խրամատներում»։

Հիշեցնենք, որ Թուրքիան Սիրիայի քրդական կառույցներին համարում է ահաբեկչական և նույնացնում իր տարածքում գործունեություն ծավալող Քուրդիստանի բանվորական կուսակցության (ՔԲԿ-PKK) հետ։

Սիրիայի քրդական ուժերի դեմ Թուրքիայի զինված ուժերի կողմից իրականացված ամենալայնամասշտաբ ռազմական գործողությունը եղել է Սիրիայի Աֆրին շրջանում՝ «Ձիթենու ճյուղ» անվամբ։ Այդ գործողության հետևանքով Աֆրինը դուրս եկավ Սիրիայի քրդական ուժերի վերահսկողությունից։

Աղբյուր` Hürriyet

Ermenihaber.am