Թուրքիայում կանգուն մնալ հաջողած Սեմեն յայլայի եկեղեցին վերանորոգման կարիք ունի

Ներկայիս Թուրքիայի տարածքում գտնվող ու Օրդուի և Գիրեսունի (Կերասուն-Ակունքի խմբ.) բնակիչների կողմից որպես մզկիթ օգտագործվող Սեմեն յայլայի եկեղեցին մարտահրավեր է նետել ժամանակին: Այդ մասին, ըստ Akunq.net-ի, հաղորդում են թուրքական լրատվամիջոցները:

Աղբյուրի համաձայն` սույն եկեղեցին ամառային ամիսներին որպես մզկիթ է օգտագործվում յայլաներ բարձրացած տեղացիների կողմից: Եկեղեցու շուրջ առկա տներում բնակվողները փորձում են պահպանել և այցելուներին ներկայացնել այս պատմական կառույցը:

Սեմենի եկեղեցու այցելուներից Բյուլենթ Աքչայն առաջին անգամ տեսնելով այս շինությունը` շեշտել է, թե միաժամանակ երկու նահանգների համատեղ արժեքը եղող սույն կառույցը հարկ է վերականգնել` տվյալ շրջաններում զբոսաշրջությունը զարգացնելու նպատակով:

Հարկ է նշել, որ Սեմեն ավանում 1900-1920 թթ. մոտ 5000 հույն էր բնակվում: 1915-1920 թթ. տվյալ շրջանի բնակիչ հույների մի մասը բռնի կերպով տեղահանվել է Հալեպ, իսկ մյուսը` գաղթել Հունաստան: Հայտնի է նաև, որ Սեմենի յայլայում աճող մի առանձնահատուկ սալորից գինի էր պատրաստվում, որն արտահանվում էր եվրոպական երկրներ: Ինչ վերաբերում է, չնայած բնության բոլոր արհավիրքներին, կանգուն մնալ հաջողած Սեմենի եկեղեցուն, ապա այս շինության տանիքը կառուցվել է 1900-1910 թթ.` լավագույն հույն վարպետների կողմից, հատուկ Մարսելից բերված կղմինդրներով:

https://www.haberler.com/semen-kilisesi-turizme-kazandirilacagi-gunu-11378204-haberi/

Պատրաստեց Մելինե Անումյանը

Akunq.net