Թուրքիայում քրիստոնյաների ահի ևս մեկ դրսևորում. Սամսունի բողոքական եկեղեցին Թուրքիայի Հանրապետության տոնը նշել է թուրքական դրոշ կախելով

Սամսունում գտնվող բողոքական եկեղեցին Թուրքիայի Հանրապետության օրը նշել է թուրքական դրոշ կախելով: Այդ մասին, Akunq.net-ի փոխանցմամբ, հաղորդում է ‘Samsungazetesi.com’ կայքը:

Աղբյուրի համաձայն` Սամսունի բողոքական եկեղեցին հանդես է եկել նաև շնորհավորական ուղերձով, որում մասնավորապես նշված է. «Մեր թանկագին ազգը Ազատագրական պատերազմում (նկատի ունի քեմալական շարժումը-Ակունքի խմբ.) մեր տարածքների նկատմամբ նկրտումներ ունեցող արտաքին ուժերի դեմ պայքար է մղել` միասնություն կազմելով` առանց կրոնի, լեզվի, ցեղի խտրականության և կին-տղամարդ, ծեր-երիտասարդ չնայելով: Մի մեծ փոփոխության և առաջընթացի մարտիկն ու օրինակը հանդիսացող հանրապետությունն ամենամեծ երաշխավորն է դարձել առ այն, որ մեր մարդիկ կարողանան իրենք իրենց ղեկավարել, և որ իշխանությունը պատկանի միայն ազգին: Մեր պետության յուրաքանչյուր անհատ ևս, այդ գիտակցությամբ և ազգային ինքնիշխանությունը աներկբա համարելով, մշտապես պահպանելու է մեր երկիրը և շարունակելու է հավատարիմ մնալ մեր արժեքներին: Այդ զգացումներով և գաղափարներով, ինչպես նաև` երախտիքով հիշում ենք մեր բոլոր զոհերին և գազիներին (պատերազմից հաղթական վերադարձած անձ-Ակունքի խմբ.), առաջին հերթին` գազի Մուստաֆա Քեմալ Աթաթուրքին և նրա զինակիցներին, և նշում Հանրապետության օրը»:

Հարկ է շեշտել, որ Թուրքիայում փոքրամասնությունների, հատկապես` քրիստոնյաների կողմից նման դրսևորումները հիմնականում վախի և ինքնապաշտպանության արգասիք են: Նմանօրինակ դրսևորում էր նաև այս տարվա օգոստոս ամսին հրապարակված Թուրքիայի կրոնական փոքրամասնությունների առաջնորդների հայտարարությունը, ըստ որի` իրենք «ազատորեն դավանում են իրենց կրոնը և ոչ մի ճնշման չեն ենթարկվում»: Այդ հայտարարության տակ Թուրքիայի հայկական համայնքից ստորագրել էին Պոլսո հայոց պատրիարքի փոխանորդ Արամ արքեպիսկոպոս Աթեշյանը, Հայ կաթոլիկ եկեղեցու առաջնորդ Լևոն Զեքիյանը, Գեդիքփաշայի հայ բողոքական եկեղեցու և դպրոցի հիմնադրամի հոգևոր ղեկավար Գրիգոր Աղաբալօղլուն, Սուրբ Փրկիչ հայկական հիվանդանոցի հիմնադրամի նախագահ Պետրոս Շիրինօղլուն, Ս․ Հակոբ հայ կաթոլիկ հիվանդանոցի հիմնադրամի նախագահ Բերնարդ Սարըբայը: Հենց նման հայտարարությունները և քայլերն են ապացուցում, որ այս պետությունում փոքրամասնությունները, հատկապես` քրիստոնյաները մշտական ահի մեջ են և հարկադրված են անընդմեջ ապացուցել իրենց հավատարմությունը` թուրքական պետությանն ու ազգին:

Մելինե Անումյան

Akunq.net