Պատմական Սեբաստիային (թուրքական անվանումը` Սվաս) ենթակա Քըզըլջաքյոյը շուրջ 100 տարի է, ինչ հայտնի է իր որակյալ մսամթերքով: Այս գյուղից հեռացած վարպետները համեղ բաստուրմա-սուջուխ պատրաստելու գաղտնիքը տարածել են նաև Թուրքիայի այլ շրջաններում, հատկապես` Կեսարիայում (թուրքական անվանումը` Կայսերի): Հայտնի է նաև, որ այս գյուղում նման որակյալ մսամթերք առաջին անգամ պատրաստել են հայերը, մասնավորապես` «Շալաք» անունը կրող մի հայ մսագործ: Akunq.net-ի հաղորդմամբ` այս մասին գրում է թուրքական «Միլլիեթ» պարբերականը:
Աղբյուրի փոխանցմամբ` վերոհիշյալ վարպետն ապրել է 20 դարի սկզբներին և 1900-ականներին տեղի գյուղացիներին սովորեցրել է համեղ բաստուրմա և սուջուխ պատրաստել: Եվ տարիներ շարունակ այս արհեստը, հորից որդի անցնելով, մեր օրեր է հասել: Այս գյուղում ծնված ու մեծացած բազմաթիվ անձինք մսագործությունը վերածել են ընտանեկան բիզնեսի: Եվ ներկայում նրանց մեծ մասն ընտանիքը պահում է հենց այդ արհեստի շնորհիվ:
Ինչպես հայտնի է, նախքան Հայոց ցեղասպանությունը Օսմանյան կայսրությունում առևտրով և արհեստներով հիմնականում զբաղվում էին տեղի փոքրամասնությունները, հատկապես` հայերը, հույներն ու հրեաները: Հայերը մեծ ներդրում ունեն Օսմանյան պետության ոչ միայն արհեստների և առևտրի, այլ նաև` մշակույթի ու գիտության զարգացման մեջ:
Պատրաստեց Մելինե Անումյանը
Akunq.net
Leave a Reply