Թուրքիայի նախագահ Ռեջեփ Թայիփ Էրդողանը քննադատել է երկրի դպրոցներում աշակերտական երդման վերականգնումը՝ նշելով, որ Թուրքիայի Հանրապետության բարձրագույն վարչական դատարանն այսպիսով սխալ քայլ է թույլ տվել:
Նշենք, որ «Թուրք եմ, ազնիվ եմ, աշխատասեր եմ» աշակերտական երդումը, որ տասնյակ տարիներ պարտադրվել է Թուրքիայի բոլոր դպրոցներին ու չեղարկվել միայն 2013-ին, պարտադրվում է նաև Ստամբուլի հայկական համայնքի բոլոր դպրոցներին:
Ինչպես գրում է թուրքական «Հյուրիյեթ» պարբերականը, Էրդողանը հատկապես բարկացել է, որ իրենց կողմից դեռևս 2013 թ. չեղարկված օրենքին դատարանն արձագանքում է միայն 5 տարի անց:
«2013-ին ո՞ւր էիք: 2013-ից մինչև 2018 թվական ո՞ւր էիք: Ինչո՞ւ մինչ այսօր սրա հետ կապված որևէ որոշում չի տրվել և միայն հիմա է տրվում: Հիմա՞ հիշեցիք: Կներեք, բայց երբ սխալ եք անում, ստիպված ենք ասել այդ մասին: Հետո երբ ժողովուրդը մեզ է քարկոծում, պատասխանը մենք ենք տալիս»,-ասել է Էրդողանը:
Leave a Reply